नेपालगन्ज : नेपाली कांग्रेसको १४ औं महाधिवेशन अन्तर्गत बाँकेमा हुन लागेको जिल्ला निर्वाचनमा सभापति पदका लागि संस्थापन (देउवा)पक्षबाट धेरै आकांक्षी देखिएका छन् । देउवा पक्षभित्र करिव आधा दर्जन आकांक्षी अहिलेसम्म देखिएका छन् ।
सभापति पदका लागि लुम्बिनी प्रदेशका वन, वातावरण तथा भूसंरक्षण मन्त्री सुरेन्द्र हमाल, पुर्वसभासद बादशाह कुर्मी, सुनिलनरसिंह राणा, निरन्जनसिंह सिजापति, राजकुमार वर्मा र लक्ष्मी नारायण शाह आकांक्षी देखिएका हुन् । सभापति पदमा सबैले आकांक्षा देखाएपछि संस्थापन पक्षबाट आधिकारिक उम्मेदवार खडा गर्न सकस परिरहेको छ ।
यि मध्ये अधिकांसले फरक–फरक प्यानल बनाउने तयारी नै गरिसकेका छन् । नेता हमाल, कुर्मी र सिजापति प्यानल बनाउने कसरतमा जुटिसकेका छन्, भने राणा, वर्मा र शाहले सभापति पदमा मात्र अहिलेसम्म आकांक्षा ब्यक्त गरिरहेका छन् । यसअघि १३ औं महाधिवेशनमा सिजापति वर्तमान सभापति किरण कोइरालासँग पराजित भएका थिए, भने शाह पहिलो चरणको मतदानबाट आउट भएका थिए ।
नेपाली कांग्रेस बाँकेको वडा तहदेखी तीन वटै क्षेत्रसम्मको निर्वाचन परिणाम हेर्दा बाँकेमा संस्थापन पक्षको बलियो पकट रहेको देखिन्छ । जिल्लाका ८१ वटै वडाबाट निर्वाचित भएका क्षेत्रीय प्रतिनिधीको संख्या हेर्दा संस्थापन पक्षको झण्डै दोब्बर बढी मत रहेको कांग्रेस वृत्तमा चर्चा छ ।
जिल्ला नेतृत्व आफ्नो आउने लगभग निश्चित जस्तै भएपछि संस्थापन पक्षका आकांक्षी धेरै बढेको नेता, कार्यकर्ताको बुझाई छ । ‘वडाबाट निर्वाचित भएका क्षेत्रीय प्रतिनिधी संस्थापन पक्षका धेरै छन्, मौकामा चौका हान्ने दाउले संस्थापन पक्षबाट धेरै आकांक्षी देखिएका हुन सक्छन्,’ एक कांग्रेस कार्यकर्ताले भने ।
संस्थापन इतर(कोइराला पौडेल) पक्षबाट नारायणप्रसाद गौडेल मात्र उम्मेदवार देखा परेका छन् । उनको उम्मेदवारी निश्चित भएर पनि प्रचार-प्रसारमा जुटिसकेका छन् । गौडेल पार्टीको १३ औं महाधिवेशनमा पनि उम्मेदवार बनेका थिए । तर, पहिलो चरणको मतदानमा तेस्रो स्थानमा आएपछि आउट भएका थिए ।
संस्थापन पक्षभित्र भने कसलाई बसाउने र कसलाई उठाउने भन्नेमै अन्यौलता देखिएको छ । कांग्रेसको प्रदेश अधिवेशनलाई लक्षित गरेर जिल्ला निर्वाचन अहिले स्थगित छ । यसले गर्दा पनि जिल्ला निर्वाचनका लागि उम्मेदवार छनोट गर्न संस्थापन पक्षलाई राहत मिलेको छ ।
संस्थापन पक्षबाट सभापति पदमा धेरै उम्मेदवार भएपनि पदाधिकारी एउटै बनाउने दवाव नेतृत्व पंक्तीलाई रहेको नेता, कार्यकर्ता बताउँछन् । बाँकेमा संस्थापन पक्षले कसलाई सभापतिको आधिकारिक उम्मेदवार बनाउने भन्नेमा अझै टुंगो लाग्न सकेको छैन । क्षेत्रीय निर्वाचन सम्पन्न भए लगत्तै उम्मेदवारी घोषणा गरेका कुर्मीले आफुलाई पार्टी सभापति शेरबहादुर देउवाले साथ दिएकाले अगाडी बढेको बताएका थिए ।
कुर्मीले पार्टी सभापति देउवाबाटै पाएको सिंग्नल अनुसार आफु नै अन्तिममा संस्थापन पक्षको आधिकारिक उम्मेदवार हुने बताउँदै आएका थिए । स्रोतका अनुसार कुर्मीले पदाधिकारी पदमा केही ब्यक्तिको नाम टुंगो लगाइसकेका छन् । तर, क्षेत्र नम्बर २ को निर्वाचन परिणाम सार्वजनिक भएपछि परिस्थिती फेरियो । महाधिवेशन प्रतिनिधीमा निर्वाचित भएका हमालले सभापतिको आकांक्षा देखाएपछि भने अहिले उनको बढी चर्चा छ ।
हमाललाई सभापतिमा उठ्न कांग्रेस नेता, कार्यकर्तादेखी शुभेच्छुक तथा बौद्धिक ब्यक्तिहरुको सुझाव छ । हमालले पार्टी नेतृत्वको जिम्मेवारी सम्हालेपछि कमजोर अवस्थामा पुगेको बाँके कांग्रेस माथी उठ्ने धेरैको अपेक्षा छ । त्यसकारण उनी सभापतिको दौडमा अगाडी बढिसकेका छन् ।
यदी उनी सभापतिको उम्मेदवारी बन्ने निश्चित भएपछि कांग्रेसलाई सही बाटोमा डोर्याउन सक्ने, भविष्य बोकेका र युवा नेताहरु पदाधिकारीमा बस्न तयार देखिन्छन् । हमाललाई सभापति बनाएर युवाहरुलाई पदाधिकारी र कार्यसमितिमा ल्याउन पार्टीभित्रका संस्थापन र संस्थापन इतर पक्षका नेताहरुले सक्रियता देखाएको स्रोत बताउँछ ।
पार्टीको १३ औं महाधिवेशनमा सभापति पदमा थोरै मतले पराजित भएकाले यसपटक नेता सिजापतिले पुनः आकांक्षा राख्नुलाई स्वभाविक ठान्छन्, उनी निकट नेता कार्यकर्ता । सिजापतिले केहीदिन अघि स्थानीय एक होटलमा आफ्नो सचिवालय नै खोलिसकेका छन् ।
अहिलेसम्म उनले सभापतिमा आफ्नो आकांक्षा प्रस्तुत गर्ने बाहेक प्यानल भने बनाएका छैनन् । प्यानल बनाउने कसरतमा छन्, सिजापति । पार्टीका वर्तमान उपसभापति समेत रहेका राणा संस्थापन इतरबाट हालै मात्र संस्थापन पक्षमा आएका हुन् । उनी पनि सभापतिमा आफ्नो दावेदारी स्वभाविक भएको बताउँछन् ।
राणा नेपाली कांग्रेसका पुराना नेता हुन् । लक्ष्मी नारायण शाह पनि पार्टीको १३ औं महाधिवेशनमा सभापतिको उम्मेदवार भएका थिए । उनी पनि यसपटक पुनः सभापतिको उम्मेदवार बन्ने बताइरहेका छन् । यस्तै नेता राजकुमार वर्मा पनि सभापति पदमा आकांक्षा राख्दै छलफलमा ब्यस्त छन् ।
