नेपालगन्ज : भेरी अस्पतालको कोभिड वार्डमा कार्यरत नर्सले कोभिड वार्डमा रहेका संक्रमित महिलालाई तीजको दर खुवाएका छन् । वार्डमै पुगेर नर्सले चुरा र टिकुली प्रदान गर्नुका साथै विभिन्न परिकारका तीजको दर खुवाएका हुन् ।
अस्पतालको कोभिड वार्डमा कार्यरत नर्सिङ अधिकृत मौनता अर्यालका अनुसार वार्डमा भर्ना भएका करिव २३ जना संक्रमित महिलालाई तीजको कोशेली चुरा र टिकुली प्रदान गर्नुका साथै दरका रुपमा खिर, केरा, मिठाई, पुरी र तरकारीका परिकारहरु खुवाएका थिए ।
महिलाको महान पर्व हरितालिका तीज नजिक आइरहेका बेला बाहिर रौनकता छाएपनि कोभिड वार्डमा भर्ना भएका महिला मृत्युसँग लड्नु परिरहेको अवस्थामा अलिकति भएपनि पीडा कम होस् भन्ने उद्देश्यले यस्तो कार्यक्रम गरिएको यहाँका नर्सहरु बताउँछन् । ‘तीज नजिक आइरहेको छ, रमाईलो पनि भइरहेको छ, तर बिरामी भएर आउनु भएका दिदी बहिनीलाई मनमा कति पीडा हुन्छ,’ नर्सिङ अधिकृत अर्यालले भनिन् ‘त्यही भएर उहाँहरुलाई पनि तीज मनाएको अनुभुती होस् भनेर हामीले सानो आर्थिक जुटाएर यो कार्यक्रम गरेका हौं ।’
अस्पतालको कोभिड वार्डमा भर्ना कतिपय संक्रमितले निको भएर घर फर्किदा दिनरात सेवा गरेका नर्सलाई केही आर्थिक सहयोग गरेका थिए । सोही रकमलाई आफुहरुले पनि थपेर कोभिड वार्डमै भर्ना भएका संक्रमित महिलालाई तीजको कोशेली र दर खुवाउने कार्यक्रम राख्ने योजना बनेको उनले सुनाईन् । दिनरात आफ्नो सेवामा खटिने नर्सले वार्डमै पुगेर तीजको कोशेली दिदाँ र दर खुवाउँदा अधिकांस संक्रमित महिला हर्षित भएका थिए ।
अस्पतालमा भर्ना भएपनि तीजको कोशेली र दर खान पाउँदा माईती कहाँ गएको जस्तो अनुभुती मिलेको एक संक्रमितले बताईन् । ‘कोरोना संक्रमणको पीडा त मनमा थियो नै, वर्षमा एक पटक आएको तीज मनाउन नपाउँदा मन साह्रै दुखी भएको थियो, तर जसरी अस्पतालका नर्सले हामीलाई तीजको कोशेली प्रदान गर्नुभयो र दर खुवाउनु भयो, यो हाम्रा लागि अविष्मरणीय नै बन्यो,’ उनले भनिन् ।
अस्पतालको कोभिड वार्डमा सोमबार दिउँसोसम्म करिव ४५ जना जति संक्रमित भर्ना छन् । त्यसमध्ये आधा जति महिला संक्रमित रहेको भेरी अस्पतालकी प्रमुख नर्सिङ प्रशासक दुर्गालक्ष्मी श्रेष्ठले जानकारी दिईन् । महामारी पूर्ण रुपमा नियन्त्रणमा नआउँदा अस्पतालमा संक्रमितहरु भर्ना हुने क्रम चलिरहेको उनले बताईन् ।
