कोहलपुर : कोहलपुर नगरपालिकामा संगिता सुवेदी एउटा चर्चित नाम हो । पार्टीको आन्तरिक निर्वाचनमा होस्, या सामाजिक संस्थाका निर्वाचनमा होस्, उनी सधैं बाजी मार्छिन् ।
कोहलपुर उद्योग बाणिज्य संघको उपाध्यक्षमा लोकप्रिय मतका साथ निर्वाचित भएकी उनी केही महिनाअघि सम्पन्न भएको कांग्रेसको १४ औं महाधिवेशनमा पनि बाँके क्षेत्र नम्बर १ बाट महाधिवेशन प्रतिनिधीमा आफुलाई निर्वाचित गराउन सफल भईन् ।
स्थानीय तहको निर्वाचन नजिकिदै गर्दा अहिले यिनै सुवेदी कोहलपुर नगरपालिकाको उपप्रमुख पदमा उम्मेदवार छिन् । नेपाली कांग्रेसले उनलाई उपप्रमुख पदको उम्मेदवार बनाएको हो । अहिले उनलाई मतदाताको घरदैलोमा पुगेर भेटघाट गर्न भ्याई नभ्याई छ । ‘दैनिक रुपमा मतदाताको घरदैलोमा पुगेरै समय बित्छ, मतदातालाई भेटेर आफ्ना कुरा राख्ने काम गरिरहेकी छु,’ उनले भनिन् ।
कोहलपुरलाई कर्णाली र सुदूरपश्चिम प्रदेशको प्रवेशद्धारका रुपमा चिनिन्छ । विस्तारै फड्को मार्दै गइरहेको कोहलपुरको विकासका लागि उपप्रमुख पद महत्वपूर्ण मानिन्छ । नयाँ संविधानले उपप्रमुखलाई धेरै अधिकार र जिम्मेवारी दिएको छ । यसले गर्दा पनि कांग्रेसले सुवेदीलाई उपप्रमुख पदका लागि उपयुक्त ब्यक्ति ठानेर उम्मेदवार बनाएको हो ।
‘पार्टीले मलाई उपप्रमुख पदमा योग्य ठानेर उम्मेदवार बनाएको छ, कोहलपुरको विकासका लागि धेरै काम गर्ने मेरा योजना छन्,’ उनले भनिन् ‘मलाई काम गर्ने ठाउँमा पुर्याउने जिम्मा आम कोहलपुर नगरबासीकै हो ।’ नगर उपप्रमुख पदमा पुगेर जनताको सेवा गर्न पाउनेमा आफु आशावादी रहेको सुवेदीले बताइन् ।
कोहलपुरमा २०७४ को निर्वाचनमा उपप्रमुख पदमा कांग्रेसका तर्फबाट सञ्जुकुमारी थारु विजयी भएकी थिइन् । स्थानीय सरकार उपप्रमुखका रुपमा सञ्जुले कोहलपुरमा धेरै काम गर्न सफल भइन् । कोहलपुरमा सञ्जुले गरेका कामको अनुभव लिदै गर्न बाँकी रहेका अधुरा कामलाई पुरा गर्ने उपप्रमुख पदका उम्मेदवार सुवेदी बताउँछिन् ।
स्थानीय सरकारको उपप्रमुख पदमा बसेपनि जनताको सेवक भएर काम गर्ने आफ्नो ईच्छा रहेको उनले सुनाइन् । ‘जनताको सेवक भएर दिनरात काम गर्ने मेरो ईच्छा छ, त्यसका लागि मलाई आफ्नो मत दिनु हुन नगरबासी दाजुभाई दिदी बहिनीसँग विनम्रता पुर्वक अनुरोध गर्दछु,’ सुवेदीले भनिन् । कोहलपुर नगरपालिका–११ निवासी ३८ वर्षीया सुवेदीले प्रविणता प्रमाणपत्र तह अध्ययन गरेकी छन् ।
२०४१ सालमा कास्कीमा जन्मिएकी सुवेदीले आफ्नो कर्मथलो भने कोहलपुरलाई बनाइन् । स्थानीय ग्रीनपिस माध्यामिक बिद्यालयबाट माध्यामिक तह उर्तिण गरेर प्रविणता प्रमाणपत्र तह भने उनले कोहलपुरस्थित बागेश्वरी बहुमुखी क्याम्पसबाट गरिन् । समाजसेवाका क्षेत्रमा पनि सुवेदीको लामो अनुभव छ । जेसीसको अध्यक्ष, लाइन्स अफ कोहलपुर कस्वतीको अध्यक्ष, लोक तथा दोहोरी प्रतिष्ठानको सल्लाहाकार लगायत विभिन्न संघ, संस्थामा नेतृत्वदायी भूमिका उनले निभाइसकेकी छन् ।
युवा पुस्ताका लोकप्रिय, सहयोगी, मिलनसार स्वभावकी सुवेदीसँग अन्य उपप्रमुख पदका उम्मेदवार भन्दा फरक पहिचान छ । ‘म पैसा कमाउनका लागि राजनीतिमा आएको होइन, कोहलपुर नगर उपप्रमुखको जिम्मेवारी पाएपछि मैले निस्वार्थ रुपले जनताको सेवा गर्नेछु,’ उनले भनिन् ।
