नेपालगन्ज : श्री एयरको जहाजभित्र धुवा निस्केपछि बिहीबार आकस्मिक अवतरण गरियो । नेपालगन्जदेखि काठमाडौ जाँदै गरेको नाइन एन-एएनएफ-४३२ नम्बरको जहाज आकस्मिक अवतरण गरिएको थियो । बिहान ९ बजेर १५ मिनेटको तालिका रहेपनि जहाज केही समय ढिलो गरी ९ बजेर ४९ मिनेटमा मात्र उडेको थियो । उक्त जहाजमा ७९ जना यात्रु र ४ जना चालक दलका सदस्य सहित कुल ८३ जना सवार थिए ।
चालकको सावधानीका कारण जहाज ठुलो दुर्घटना हुनबाट जागियो र यात्रारत सबै सकुशल भए । नेपालगन्ज विमानस्थल कार्यालयका अनुसार जहाजले करिव १० किलोमिटर दुरी पार गरिसकेको थियो, लगत्तै जहाजको शौचालय भित्रबाट धुवा निस्केपछि ७ मिनेटमै पुनः नेपालगन्ज बिमानस्थलमै फर्काएर ल्याण्ड गरियो ।
नेपालगन्ज विमानस्थल कार्यालयका प्रमुख सुरेश खनालका अनुसार जहाजमा प्राविधिक समस्या देखिएको छ । काठमाडौंबाट बिहीबार नै आइपुगेको इन्जिनियर(प्राविधिक) टोलीले शुक्रबार पनि जहाज चेकजाँच गरिरहेको छ । नेपालगन्ज-काठमाडौंका लागि दैनिक पाँच वटा उडान भर्दै आएको श्रीएयरले बिहीबार भने ४ वटा उडान भर्ने तय गरेको थियो ।
उक्त जहाजमा समस्या आउँदा बिहीबार श्री एयरका ३ वटा मात्र उडान भएका छन् । विमानस्थल कार्यालयका अनुसार प्राविधिक समस्या देखिएको उक्त जहाज बिहीबार बिहान काठमाडौंबाट यात्रु लिएर नेपालगन्ज आइपुगेको थियो । उक्त जहाजलाई काठमाडौंमा इन्जिनियरले चेकजाँच गरेर मात्र उडाइएको कम्पनीको दाबी छ ।
उडानमा कम्पनीको लापरबाही
त्रिभुवन अन्तराष्ट्रिय विमानस्थल भन्दा बाहिरका विमानस्थलमा पनि कम्पनीहरुले जहाज अनिवार्य रुपमा राख्नुपर्ने सरकारको निर्णय पश्चात श्री एयरले पनि हरेक दिन बेलुका नेपालगन्जमा एउटा जहाज राख्ने गरेको छ । श्री एयरका नेपालगन्ज स्टेशन प्रमुख पर्शुराम चौधरीका अनुसार हरेक दिन बेलुका यहाँ बास बस्ने जहाज ५० सिटे जेट इन्जिनयुक्त जहाज हो ।
नियम अनुसार कुनैपनि जहाज उड्नु भन्दा अगाडी इन्जिनियरले ‘फ्री फ्लाई’ चेकजाँच अनिवार्य रुपले गर्नुपर्छ । तर, नेपालगन्जमा बास बस्ने उक्त जहाजले इन्जिनियरबाट जाँच नभएरै यहाँबाट पहिलो उडान भर्ने गरेको पाइएको छ । श्री एयरलाइन्स कम्पनीसँग ‘फ्री फ्लाई’ जाँच गर्ने इन्जिनियर नेपालगन्जमा उपलब्ध छैनन् ।
जसले गर्दा बिहानको पहिलो उडान पाइलटले सधैं जोखिम मोलेर उडाउने गरेको नेपालगन्ज विमानस्थल कार्यालय स्रोतले जनाएको छ । ‘श्री एयरको बेलुका अन्तिम उडानको जहाज नेपालगन्जमा आएर बास बस्छ, तर भोलीपल्ट बिहान इन्जिनियरको परिक्षण बिना नै पहिलो उडान गरिन्छ,’ विमानस्थल स्रोतले भन्यो ‘यसमा श्री एयरलाइन्सको कम्पनीले गम्भिर लापरबाही गरिरहेको छ, नेपाल नागरिक उड्डयन प्राधिकरण पनि आँखा चिम्लिएर बस्दै आएको छ ।’
नागरिक उड्डयन प्राधिकरणको नियम अनुसार कुनैपनि कम्पनीले आफ्नो जहाज इन्जिनियरलाई राम्ररी जाँच गराएर मात्र उडाउनुपर्छ । श्री एयरका नेपालगन्ज स्टेशन प्रमुख चौधरीले जहाज चेकजाँच गर्नलाई आफ्नो कम्पनीसँग नेपालगन्जमा इन्जिनियर उपलब्ध नरहेको स्वीकार गर्छन् ।
‘नेपालगन्जमा हामीसँग इन्जिनियर छैनन्, काठमाडौंमै इन्जिनियरले जहाजको फ्री फ्लाई जाँच गरेर पठाउँछन्,’ उनले भने । नेपालगन्जमा हरेक दिन ५० सिटे ‘जेट इन्जिनयुक्त’ जहाज बस्ने गरेको बताउँदै भने, ‘बेलुका बास बस्ने यो जहाजको सबै चेकजाँच काठमाडौंमा इन्जिनियरले गरेर पठाउँछन्, भोलीपल्ट बिहान यहाँ पुनः जाँच गर्नुपर्दैन ।’
नेपालगन्ज विमानस्थलका प्रमुख खनालले कतिपय जहाजले काठमाडौंमै २४ घण्टा सम्मका लागि इन्जिनियरसँग ‘फ्री फ्लाई’ जाँच गराउने गरेको बताए । श्री एयरसँग नेपालगन्जमा इन्जिनियर उपलब्ध भए/नभएको विषयमा आफुलाई जानकारी नभएको उनले सुनाए । ‘यस विषयमा हामी केही भन्न सक्दैनौं,’ उनले भने ।
