नेपालगन्ज : नेपालगन्ज हेल्थ क्याम्पसका बिद्यार्थीलाई स्वागत तथा विदाई कार्यक्रम गरिएको छ । क्याम्पसमा बुधबार आयोजित एक समारोहका बीच बिद्यार्थीलाई स्वागत तथा विदाई गरिएको हो ।
कार्यक्रमका प्रमुख अतिथी एवम् नेपालगन्ज उपमहानगरपालिका नगर प्रमुख प्रशान्त विष्टले जनताले स्वास्थ्य सेवा सर्वसुलभ र सहज रुपमा पाउने अधिकारलाई स्थापित गर्न स्वास्थ्य शिक्षाको महत्वपुर्ण भुमिका रहनेमा जोड दिए । उनले गुणस्तरीय प्राविधिक शिक्षा समाजको प्रमुख आवश्यकता रहेको बताए ।
पश्चिम नेपालमा स्वास्थ्य शिक्षाको क्षेत्रमा नेपालगन्ज हेल्थ क्याम्पसले हासिल गरेको सफलतालाई प्रशंसा गर्दै नगर प्रमुख विष्टले आगामी दिनमा थप सफलताको कामना सहित शुभकामना दिए । उक्त कार्यक्रममा डिप्लोमा इन फार्मेसीको पहिलो वर्षमा उत्कृष्ट हुने विद्यार्थी प्रमेश्वर थारु र ल्याब तर्फ उत्कृष्ट हुने निरुता थारुलाई प्रमुख अतिथी समेत रहेका नगर प्रमुख विष्टले मेडल र प्रमाणपत्र सहित सम्मान गरे ।
उक्त कार्यक्रममा क्याम्पसका विद्याथीले विभिन्न सांस्कृतिक प्रस्तुती देखाएका थिए । सो क्रममा नेपालगन्ज हेल्थ क्याम्पसका प्रबन्ध निर्देशक तथा संविधान सभा सदस्य मैकुलाल बाल्मिकीले नगर प्रमुख विष्टलाई मायाको चिनो प्रदान गरेका थिए ।
उक्त क्याम्पस १६ वर्ष अघि स्थापना भएको थियो । कलेजले सुरुवातदेखी स्वास्थ्य शिक्षाको क्षेत्रमा महत्वपुर्ण उपलब्धी हासिल गर्दै आएको छ । क्याम्पस नेपालगन्ज उपमहानगरपालिका वडा नम्बर १० स्थित आर्दशनगरमा विगत केही वर्षदेखी आफ्नै सुविधा सम्पन्न भवनमा सञ्चालितमा रहेको छ । हरेक वर्ष दक्ष विद्यार्थी उत्पादन गरेर राज्यलाई सहयोग गर्दै आएको छ ।
क्याम्पसका प्रबन्ध निर्देशक बाल्मिकीले विद्यार्थी, शिक्षक, कर्मचारी र सहकर्मीको मेहेनेतले कलेजले थुप्रै सफलता हासिल गरेको बताए । ‘नौ जना विद्यार्थी लिएर कलेज स्थापना भएको थियो, अहिले हरेक वर्ष नयाँ ७० जना विद्यार्थी आउने र पुराना विद्यार्थी विदाई हुने गरेका छन्,’ उनले भने ‘हामीले स्वास्थ्य शिक्षाका क्षेत्रमा गुणस्तीय विद्यार्थी उत्पादन गर्नेसँगै पाँच करोड भन्दा बढी रकमको छात्रवृत्ति प्रदान गरिसकेका छौं, यसले पनि नेपालगन्ज हेल्थ क्याम्पसले शिक्षाको क्षेत्रमा कति योगदान गरेको छ भन्ने प्रष्ट पार्छ ।’
क्याम्पसले आगामी दिनमा नेपालगन्जमा पहिलो पटक आयुर्वेदिक चिकित्सा सेवाको सुरुआत गर्ने तयारी गरेको बाल्मिकीले जानकारी दिएका छन् । क्याम्पसले हालै प्रकाशित सिटिइभिटीको अन्तिम नतिजामा डिप्लोमा इन फार्मेसीको तेस्रो र सिएमएलटी तेस्रो वर्षमा गत वर्षझैं सत प्रतिसत नतिजा निकाल्न सफल भएको थियो । सिएमएलटी तर्फ १५ औं ब्याच र फार्मेसी तर्फ छैठौं व्याचका विद्यार्थी गरी करिव १ हजार विद्यार्थी क्याम्पसले उत्पादन गरिसकेको छ ।
क्याम्पसबाट उत्पादन भएका ७ जना विद्यार्थीले एमबिबिएस तहको परीक्षामा पुर्ण छात्रवृत्ति प्राप्त गरेका छन् । उत्पादन भएका ३० प्रतिशत बिद्यार्थीले फार्मेसी, मेडिकल ल्याब सञ्चालन गरिरहेका छन् । २० प्रतिशतले सरकारी, २० प्रतिशत विदेशमा रोजगारीका लागि गएका छन् भने ३० प्रतिशतले एनजिओ र आइएनजिओमा काम गरिरहेको क्याम्पसले जनाएको छ ।
क्याम्सपका प्रिन्सिपल प्रभाकर मिश्रले क्याम्पसले सर्वसुलभ रुपमा गुणस्तरीय शिक्षा, रोजगारको अवसर बृद्धि, तालिम प्राप्त योग्य सक्षम जनशंक्ति उत्पादन गर्ने र स्वास्थ्य उद्यमशिलताको विकास गर्ने उद्देश्य सहित काम गरिरहेको बताए ।
