बाँके(कुसुम) : बाँकेको राप्ती सोनारी गाउँपालिका वडा नम्बर १ कुसुमस्थित भम्का गाउँबासीको दैनिकीमा यतिबेला परिवर्तन आएको छ । राप्ती नदीका कारण यहाँका स्थानीयलाई यसअघि गाउँसम्म सहज रूपमा आवत-जावत गर्न निकै समस्या हुने गरेको थियो ।
गाउँलाई जोड्न राप्ती नदीमा झोलुंगे पुल बनेपछि यहाँका स्थानीयको दैनिकीमा परिवर्तन आएको हो । पुल बनेपछि आवत जावत गर्न निकै सहज भएको स्थानीय बताउँछन । राप्ती सोनारी गाउँपालिका वडा नम्बर १ भम्का निवासी विजय खुनाले झोलुङ्गे पुल बनेपछि आवत-जावत गर्न धेरै सहज भएको बताए ।
'पहिला डुंगा लाग्थ्यो यहाँ, पुल नहुँदा गाह्रो थियो, पुल बनेपछि धेरै राम्रो भयो, धेरै भन्दा धेरै सुविधा भएको छ,' उनलेे दूरसन्चार डटकमसँग भने 'पुल हुँदा मान्छे हिड्ने, बाईक हिड्ने भयो, अहिले आउँदा जादा खासै समस्या छैन ।' 
सोही गाउँका युवा सन्तोष बि.क.ले विद्यालय जाँदा पहिला धेरै समस्या भोग्नु परेको स्मरण गर्दै भने, 'पढ्ने बेलामा पुल नहुँदा धेरै पीडित थियौ हामी, नदी बढ्दा भवानीयापुर भएर जाने समस्या थियो, पुल बन्दा धेरै खुसी छौँ, जतिखेर पनि आवत-जावत गर्न सजिलो भएको छ ।'
नदीमा पुल नहुँदा यस अघि स्थानीयले डुंगाबाट जोखिमपुर्ण यात्रा गर्नुपर्थ्यो । जोखिमपुर्ण यात्राकै क्रममा डुंगा पल्टेर कतिपयले अकालमा ज्यान गुमाउन पुगेका थिए । डुंगामा यात्रा गर्नुपर्ने बाध्यताले गर्दा स्थानीयले दिनमा भन्दा रातको समयमा कमै मात्रामा आवत जावत गर्थे ।
स्थानीय युवा तथा शिक्षक खडानन्द डाँगी भन्छन्,'रात बिरात हिड्नुपर्दा अप्ठ्यारो हुन्थ्यो, पुल बनेपछि राती जतिबेला आएपनि भयो, अहिले धेरै सजिलो भएको छ । 'भम्का गाउँ हुँदै प्रशिद्द पर्यटकिय स्थल गाइलेकसम्म पुग्न सकिन्छ । पुल बनेपछि सर्बसाधारणलाई सुबिधाका साथै गाईलेकको पर्यटनलाई जोड्ने काम पनि गरेको स्थानीय बुद्धिजिबी तथा शिक्षक डिल्ली डाँगी बताउँछन । 'सामान्य सर्बसाधारणले सुबिधा पाइराख्नु भएको छ, यो पुलले गाईलेकको पर्यटनलाई जोड्ने काम गर्छ,' उनलेे भने ।
पुल नहुँदा सास्ती हुन थालेपछि गाउँका अगुवा समेत रहेका नेपाली काँग्रेस बाँके क्षेत्र नम्बर १ का तत्कालिन सभापति माधवराम खत्रीले करिब चार वर्षअघि संघीय मन्त्रालयमा पटक-पटक धाएर राप्ती नदीको बैरिया-भम्का घाटमा झोलुंगे पुल बनाउने योजना पार्न सफल भएका थिए ।
पुल बनाउने योजना स्वीकृत भएपछि भम्का गाउँका स्थानीय बासिन्दा समेत रहेका खत्री, राप्ती सोनारी गाउँपालिकाका तत्कालिन अध्यक्ष लाहुराम थारु र उपाध्यक्ष धनीकुमारी खत्रीले संयुक्त रूपमा सिलान्यास गरेका थिए । त्यसक्रममा गाउँका स्थानीयले खुसी मनाएका थिए । 
झोलुंगे पुल सिलान्यास पश्चात ठेकेदारले काम सुरु गर्न लाग्दा केही समयसम्म राजनीतिकरण समेत भयो । केही ब्यक्ती बिरोधमा उत्रिएपनि ठेकेदार कम्पनीले काम अगाडी बढायो । पुल निर्माणमा भएको राजनीतिकरण, कोरोना महामारी, ठेकेदारको ढिला सुस्ती लगायत कारणले गर्दा उक्त पुल तोकिएको समय भन्दा झन्डै दुई वर्ष ढिलो सम्पन्न भएको थियो । ढिलै भएपनि पुल बनेर आवत जावत गर्न पाउँदा अहिले सबै खुसी छन ।
भिडियो हेर्नुस् :
