नेपालगन्ज : पश्चिम नेपालको सर्वाधिक पुरानो पत्रिका कालपृष्ठ दैनिकले आफनो २५औं रजत जयन्तको अवसर पारेर मंगोलियन जुडो क्लब खजुराका खेलाडीलाई सहयोग गरेको छ । कालपृष्ठ दैनिकले खजुरा गाउँपालिका वडा नम्बर ३ मा रहेको मंगोलियन जुडो क्लबमा प्रशिक्षण लिइरहेका उत्कृष्ट १२ खेलाडीलाई ट्रयाकसुट प्रदान गरेको हो ।
मंगोलियन क्लबबाट खेल्ने ८ जना खेलाडी लुम्बिनी प्रदेशबाट नवौं राष्ट्रिय खेलकुद प्रतियोगितामा खेल्दैछन् । कालपृष्ठ दैनिकका प्रबन्ध निर्देशक कमल खत्री र कालपृष्ठ दैनिकका बजार प्रमुख दुर्गा पौडेलले मंगोलियन जुडो क्लबका प्रशिक्षक विजय गुरुङलाई संयुक्त रुपमा ट्रयाकसुट प्रदान गरेका थिए ।
नेपालगन्जबाट नियमित रुपमा प्रकाशित हुँदै आएको कालपृष्ठ दैनिकले यस वर्ष आफनो स्थापनाको २५औं वर्ष मनाउने तयारी गरिरहेको छ । रजत जयन्ती अघि खेलक्षेत्रका व्यक्तिको सम्मान र हौसला बढाउन सहयोग गरिएको कालपृष्ठ दैनिकका प्रबन्ध निर्देशक कमल खत्रीले बताए ।
उनले भने, ‘ रजत जयन्तीको अवसर पारेर खेलकुद क्षेत्रमा राम्रो नतिजा निकालिरहेको क्लबका खेलाडीलाई सहयोग गर्न पाउँदा खुसी लागेको छ, भौतिक पुर्वाधार, स्रोत साधन विना मंगोलियन क्लबले ओलम्पियन जस्ता खेलाडी उत्पादन गरिसकेको छ ।'
क्लबले नेपाली खेलकुद क्षेत्रमा महत्वपुर्ण योगदान गरिरहेको छ । खेलाडीको हौसला बढोस भनेर हामीले सहयोग गरेका हौं । आगामी दिनमा हामी सक्दो सहयोग गर्नेछौं ।’ मंगोलिन क्लबका प्रशिक्षक विजय गुरुङले आर्थिक अभावका बिच क्लबले प्रतिभावान खेलाडी उत्पादन गर्न सफल भएको बताए ।
उनले भने, ‘कालपृष्ठ दैनिकलाई धेरै धन्यवाद, यस्तै संघ संस्थाको साथ र सहयोगले हामीलाई खेलमा लाग्न उर्जा थप्ने गर्छ, खेलकुद क्षेत्रमा काम गर्न सहज छैन, आर्थिक अभाव सधै रहन्छ, तरपनि खेलकुद प्रतिको लगावले मैले प्रशिक्षणलाई रोकेको छैन ।’
