पोखरा : पोखरामा जारी नवौं राष्ट्रिय खेलकुद अन्तर्गत बुधबार सम्पन्न ब्याडमिन्टनमा प्रिन्स दाहाल र विभागिय टोली त्रिभुवन आर्मीकी रशिला महर्जन च्याम्पियन भएका छन् । खेलमा प्रिन्स र रशिलाले स्वर्ण पदक जितेका हुन् ।
पोखराको रगंशालास्थित ब्याडमिन्टन कभर्डहलमा भएको प्रतियोगिताको फाइनलमा पुलिसकै खेलाडी विष्णु कटुवाललाई २१-११, २१-४ को नजितामा पराजित गर्दै पुरुष एकलतर्फ प्रिन्स नयाँ राष्ट्रिय च्याम्पियन बनेका हुन् । लुम्बिनीका ईरफान अन्सारी र सेनाका प्रफुल महर्जनले कास्य पदक प्राप्त गरेका छन् ।
महिला एकलतर्फ सेनाकी रशिलले सेनाकै अनुमाया राईलाई २२-२०, २१-९ को नतिजामा पराजित गर्दै राष्ट्रिय च्याम्पियनको उपाधि कायम राखिन् । महर्जन आठौं राष्ट्रिय खेलकुदकी विजेता हुन् । पूर्व राष्ट्रिय च्याम्पियन नङ्गशलदेवी तामाङ र सेनाकी अमिता गिरीले कास्य पदक जितेका छन् । मिक्स युगलतर्फ नेपाल पुलिसका जीवन आचार्य र निता लम्सालको जोडीले बाजी मार्यो ।
उक्त जोडीले सेनाका प्रफुल महर्जन र रशिला महर्जनको जोडीलाई २१-१२, २१-११ को सहज जित निकाल्दै स्वर्ण जिते । गण्डकीका विशाल खड्का र याम कुमारी गुरुङको जोडी तथा सेनाका सुरोज महर्जन र अमिता गिरीको जोडीले कास्य जिते ।
महिला युगलतर्फ आर्मीकै अमिता गिरी र रशिलाको जोडीले सोही विभागीय टिमका प्राथना देउवा र अनुमाया राईको जोडीलाई २१-१५, २२-२० सेटमा पराजित गर्दै स्वर्ण पदक जिते ।
प्रदेश १ का रोजी राई र सृष्टी राईको जोडी तथा एपिएफका जेशिका गुरुङ र सुनयना मुखियाको जोडीले कास्य पदक प्राप्त गरे । पुरुष युगलमा सेनाका प्रफुल महर्जन र रुकेश महर्जनको जोडीले पुलिसका प्रिन्स दाहाल र सुदीप सेढाइको जोडीलाई २१-१९, २१-१७ ले पराजित गर्दै सेनाका लागि अर्की स्वर्ण जिते ।
तेस्रो स्थानमा पुलिसका जीवन आचार्य र विष्णु कटुवालको जोडी तथा गण्डकीका बिधान अधिकारी र भुगोल गुरुङको जोडी रहे । आर्मीले ब्याडमिन्टनबाट ७ मध्ये ५ स्वर्ण जितेको छ । नेपाल पुसिलसे २ स्वर्ण हात पार्यो ।
प्रतियोगिताका विजेतालाई युवा तथा खेलकुद मन्त्री महेश्वरजंग गहतराज अथक, राखेपका सदस्य दिपेन्द्र बिष्ट लगायतले पुरस्कार तथा प्रमाणपत्र वितरण गरेका थिए । सो क्रममा मन्त्री गहतराजले विजेता टोलीलाई बधाई तथा शुभकामना दिएका थिए ।
