काठमाडौं : ‘डाँडाको वर पीपल’ ले आफ्नो प्रचार सुरु गरेको छ । दसैंको अवसरमा आगामी असोज २६ गते घटस्थापनाको दिनबाट प्रदर्शनमा आउन लागेको फिल्मले आफ्नो प्रचार थालेको हो ।
यो शोभित बस्नेतको निर्देशनमा तयार भएको फिल्म हो । फिल्मले ‘काट्दिम्ला जुँगा जम्मै’ बोलको गीत सार्वजनिक गर्दै प्रचार प्रसार थालेको छ । गीतमा स्वर्गीय खेमराज गुरुङ र गायिका रिमा गुरुङ होडाको स्वर रहेको छ ।
गीतमा उमंग लामा र केशव चौलागाईंको शब्द, उमंग लामाको संगीत छ । यस्तै शिव श्रेष्ठ, भुवन केसी र गौरी मल्लको समेत नृत्य रहेको छ । गीतमा सलोन बस्नेत, रुविना थापा, विनोद न्यौपाने, राजीवजंग बस्नेत लगायतलाई देख्न सकिन्छ । भिडियोमा रामजी लामिछानेको कोरियोग्राफी रहेको छ ।
काठमाडौको चित्लाङ वरपर छायाँकन भएको फिल्ममा अस्मिता जुरेली, हिउँवाला गौतम, उत्तम केसी, संगम भण्डारी, सुशान्तकुमार श्रेष्ठ, प्रभात पल, अस्मी थापा, प्रदीप गिरी, ज्ञानकुमार कट्टेल लगायतका कलाकारको अभिनय समेटिएको छ ।
