नेपालगन्ज : उच्च अदालत बार एशोसियशन नेपालगन्जको निर्वाचनका लागि ‘बृहत लोकतान्त्रिक, प्रगतिशिल, समावेशी, पेशागत कानून ब्यवसायी समुह’ ले आफ्नो तयारी पुरा गरेको छ ।
बार एशोसियशनमा आगामी दुई वर्षे कार्यकालका लागि शनिबार बिहान ८ बजेदेखी ४ बजेसम्म मतदान हुदैछ । बाँके जिल्ला अदालत परिसरमा रहेको बार एशोसियशनको भवनमा हुने मतदानमा २ सय १४ जना मतदाताले मतदान गर्नेछन् ।
उक्त निर्वाचनका लागि बृहत लोकतान्त्रिक, प्रगतिशिल, समावेशी, पेशागत कानून ब्यवसायी समुहका तर्फबाट अध्यक्ष पदमा अधिवक्ता चित्रबहादुर शाही मैदानमा उत्रिएका छन् । सोही समुहबाट उपाध्यक्ष पदमा तिर्थराज ज्ञवाली, सचिवमा गणेशप्रसाद शर्मा तथा सदस्यहरुमा सतिशचन्द्र थारु, रिजवान अहमद मिर्जा, जयराम थारु, बिरेन्द्रकुमार बस्नेत, हरिशचन्द्र सिजापति, जयराम जैसी, पूर्णप्रसाद ढकाल र हिराबहादुर श्रेष्ठले प्रतिस्पर्धा गर्दैछन् । यि उम्मेदवारहरु चुनाव जित्नेमा ढुक्क देखिएका छन् ।
उक्त समुहबाट कोषाध्यक्ष पदको उम्मेदवार रहेका हरि सुवेदी र शान्ता पोखरेल सदस्य(महिला) भने निर्विरोध निर्वाचित भईसकेका छन् । बृहत लोकतान्त्रिक, प्रगतिशिल, समावेशी, पेशागत कानून ब्यवसायी समुहमा नेपाली काँग्रेस निकट डिएलए, एमाले निकट पिपिएलए, माओवादी केन्द्र सम्वद्ध आरपिएलए लगायत संगठनहरु आवद्ध छन् ।
उक्त समुहबाट अध्यक्षसहित कोषाध्यक्ष र ५ जना सदस्य डिएलएको भागमा परेको छ । यस्तै सचिव सहित ३ जना सदस्य पिपिएलएले पाएको छ, भने उपाध्यक्ष र सदस्य(महिला) पद आरपिएलएलाई दिइएको छ ।
चुनावको पुर्वसन्ध्यामा शुक्रबार बेलुका आयोजित बृहत भेलामा बृहत लोकतान्त्रिक, प्रगतिशिल, समावेशी, पेशागत कानून ब्यवसायी समुहका उम्मेदवारले आफुहरुको जित सुनिश्चित भईसकेको बताए । अध्यक्ष पदका उम्मेदवार शाहीले ब उच्च अदालत बार एशोसियशनलाई सशक्त रुपमा अगाडी बढाउन आफ्नो टिमले जित्नुपर्ने बताए । ‘यो अस्तित्वको लडाई हो, आफ्नो मतलाई जोगाएर चुनावमा होमिनु हाम्रो लागि च्यालेन्जको विषय छ,’ उनले भने ।
२०६१ सालमा तत्कालिन पुनरावेदन बारको साधारण सदस्य भएर कानुन ब्यवसायी पेशा सुरु गरेका अधिवक्ता शाही २०६६ सालमा तत्कालिन अध्यक्ष सुनिलकुमार श्रेष्ठ नेतृत्वको कार्यसमितिमा सदस्य भएका थिए । २०७१ सालमा उच्च अदालत बारको कोषाध्यक्ष भएका उनी २०७६ सालमा सचिव पदमा निर्वाचित भएका थिए ।
भेलालाई सम्बोधन गर्दै डिएलएका केन्द्रिय सदस्य लोकबहादुर शाहले चित्रबहादुर शाही नेतृत्वको टिम निर्वाचित हुने सुनिश्चित भईसकेको र यो टिमले अबको बार कस्तो बनाउने, जितेपछि के के काम गर्ने भन्ने उद्देश्य राख्नुपर्ने सुझाव दिए । एमाले निकट पिपिएलएका केन्द्रिय सदस्य बसन्त गौतमले तीन वटा संगठन उच्च मनोबलका साथ चुनावी मैदानमा उत्रिएको हुँदा जित निश्चित भएको बताए । चुनावमा होमिएपछि एकतावद्ध रुपले लाग्नुपर्ने उनको आग्रह छ ।
डिएलए बाँकेका अध्यक्ष जनकबहादुर शाहीको अध्यक्षतामा सम्पन्न भेलामा आरपिएलएका मोहनविक्रम अर्यालले स्वागत गरेका थिए । उक्त भेलामा नेपाल बारका पुर्व केन्द्रिय उपाध्यक्ष एवम् वरिष्ठ अधिवक्ता सुनिल कुमार श्रेष्ठ, पुर्वकेन्द्रिय उपाध्यक्ष प्रहलादबहादुर कार्की र शालिकराम सापकोटा, वरिष्ठ अधिवक्ता श्यामप्रसाद गौतम र दिपककुमार रेग्मी, उच्च अदालत बारका पुर्वअध्यक्ष झविन्द्रप्रसाद पौडेल, धु्रबप्रसाद बस्याल, लोकबहादुर शाह, ईश्वरी ज्ञवाली, बलबहादुर चन्द र वर्तमान अध्यक्ष शिवकुमार श्रेष्ठ, अग्रज कानुन ब्यवसायी बासुदेव ज्ञवाली, वर्तमान कार्यसमिति पदाधिकारी, विभिन्न संगठनमा आवद्ध कानुन ब्यवसायी, सञ्चारकर्मी लगायतको उपस्थिती रहेको थियो ।
