नेपालगन्ज : ‘धारा नवौं नेपालगन्ज म्याराथन’को उपाधि एपीएफ क्लबका गोपीचन्द्र पार्कीले जितेका छन् । नेपालगन्ज म्याराथनमा उनको यो दोस्रो उपाधि हो । यसअघि छैठौं संस्करणमा पनि पार्कीले उपाधि हात पारेका थिए ।
छैठौंमा उपाधि जितेपछि उनी नेपालगन्ज म्याराथनको सातौं र आठौं संस्करणमा सहभागिता जनाएनन् । म्याराथनमा नेपाल आर्मीका खडकबहादुर खड्का उपविजेता बनेका छन् । म्याराथनको आठौं संस्करणमा उपाधि जितेका खड्काले यसपटक उपविजेतामै चित्त बुझाए ।
यस्तै एपीएफका किरणसिंह बोगटी तेस्रो स्थानमा आएका छन् । उनले यसअघि ७ औं संस्करणमा उपाधि जितेका थिए । दक्षिण एसियाली खेलकुद (साग) मा ४२ किलोमिटर म्याराथनमा उनले नेपाललाई स्वर्ण दिलाएका थिए ।
म्याराथन विजेता पार्कीले नगद दुई लाख, उपविजेता खड्काले एक लाख र तेस्रो स्थानमा आएका बोगटीले ५० हजार रुपैयाँ प्राप्त गरेका छन् । यसैगरी हाफ म्याराथनमा सन्तोषी श्रेष्ठले ह्याट्रिक गरेकी छन् । जितसँगै उनले नगद ७५ हजार प्राप्त गरिन् ।
यसअघि पनि दुई पटक सातौं र आठौं संस्करणको हाफ म्याराथनमा सन्तोषीले उपाधि जितेकी थिइन् । सन्तोषी १३ औँ सागमा १० किलोमिटरतर्फ स्वर्ण विजेत खेलाडी हुन् । हाफ म्याराथनमै फूलमति राना उपविजेता र पुष्पा भण्डारी तेस्रो स्थानमा आएका छन् ।
फूलमतिले नगद ५० हजार र पुष्पाले नगद २५ हजार प्राप्त गरे । विस्तृत शान्ति सम्झौता भएको दिन ५ मंसिरको स्मरणमा नेपालगन्जमा हरेक वर्ष क्रियटिभ ह्याण्ड्सले प्रतियोगिता आयोजना गर्दै आएको छ ।
प्रतियोगिताको उद्घाटन शत्रमा नेपालगन्ज उपमहानगरपालिकाका मेयर प्रशान्त विष्ट र महान नायक राजेश हमालले मन्तब्य राखेका थिए । प्रतियोगितामा सहभागी हुन नायिका सुरक्षा पन्त पनि नेपालगन्ज आएकी थिइन् ।
आयोजकका अनुसार म्याराथनमा २८ जना धावकले नाम दर्ता गराएकोमा १८ जनाले टर्निङ प्वाइन्ट क्रस गरेका छन् । यस्तै हाफ म्याराथन(महिला)मा २० जनाले नाम दर्ता गराएकोमा ७ जनाले टर्निङ प्वाइन्ट क्रस गरे ।
