नेपालगन्ज : नेपाल पत्रकार महासंघ बाँके शाखाले कोभिड–१९ रोकथाम र नियन्त्रणमा महत्वपूर्ण भूमिका निर्वाह गरेका विभिन्न संस्था र ब्यक्तिलाई सम्मान गरेको छ । नेपालगन्जमा शुक्रबार महासंघका केन्द्रिय अध्यक्ष विपुल पोखरेलको प्रमुख आतिथ्यतामा सम्पन्न कार्यक्रममा कोभिड-१९ रोकथाम र नियन्त्रणमा महत्वपूर्ण भूमिका निर्वाह गर्नेलाई सम्मान गरिएको हो ।
महासंघले नेपालगन्ज मेडिकल कलेजका फिजिसियन छाती तथा फोक्सो रोग विशेषज्ञ डाक्टर सुभाष योगी, स्वास्थ्य कार्यालय बाँकेका खोप अधिकृत भेषराज शर्मा, जिल्ला आपतकालिन कार्य सञ्चालन केन्द्रका सूचना व्यवस्थापन अधिकृत रुपन ज्ञवाली, स्वास्थ्य कार्यालय बाँकेका अधिकृत नरेश श्रेष्ठ, जिल्ला कोभिड १९-व्यवस्थापन केन्द्रका फोकल पर्सन तेज ओली, कोहलपुर नगरपालिकाका स्वास्थ्य शाखाका ल्याब टेक्निसियन दीपक शर्मा, जे शर्मा मेडिकलका सञ्चालक जीवन शर्मालाई सम्मान गरेको हो ।
यसैगरी वडा प्रहरी कार्यालय नेपालगन्जका इन्चार्ज प्रहरी निरीक्षक डिल्ली खड्का, गैसस महासंघ बाँकेका अध्यक्ष नमस्कार शाह, व्यवसायी विवेकराज भण्डारी र दीपेन्द्र विष्ट पनि सम्मानित भएका छन् । महासंघ बाँके अध्यक्ष दामोदर भण्डारीको सभापतित्वमा सम्पन्न भएको उक्त कार्यक्रमबाटै जिल्लामा क्रियाशील सम्पूर्ण पत्रकारहरुका लागि दुर्घटना बीमा पनि कार्यान्वयन गरिएको छ ।
सो क्रममा सगरमाथा इन्स्योरेन्स नेपालगन्जका प्रमुख गोविन्द उपाध्यायले अध्यक्ष भण्डारीलाई बीमा पोलिसी हस्तान्तरण गरेका थिए । महासंघ बाँके शाखामा आवद्ध ३ सय २३ सहित जिल्लामा क्रियाशिल ३ सय ५३ जना पत्रकारको दुई लाख रुपैयाँको दुर्घटना बीमा गरिएको सचिव कमल डाँगीले जानकारी दिएका छन् ।
कार्यक्रमलाई सम्बोधन गर्दै महासंघका केन्द्रिय अध्यक्ष पोखरेलले सञ्चार संस्थाले पत्रकारको श्रमको उचित मुल्यांकन गर्नुपर्ने बताए । सञ्चार संस्थाहरु श्रम शोषण गर्ने थलो बन्न नहुने उनको सुझाव थियो । ‘सञ्चार संस्थाहरु श्रम शोषण गर्ने थलो नबनुन्न, हाम्रो विशेष आग्रह छ,’ उनले भने । पत्रकारको क्षमता अभिवृद्धि गर्न महासंघले विशेष जोड दिएको उनले बताए ।
महासंघ बाँके शाखाले अगाडी सारेका योजना सुनाउँदै अध्यक्ष भण्डारीले नेतृत्व सम्हालेको ६ महिनामै पत्रकारको हकहितका क्षेत्रमा उपलब्धीमुलक कार्य गरेको बताए । ‘सामुहिक छलफल र समन्वयका साथ महासंघले बाँकेका पत्रकारका हकहितका क्षेत्रमा उल्लेख्य काम गरिरहेको छ,’ उनले भने, ‘यसमा महासंघ क्रमगत सफल भइरहेको छ ।’ पत्रकारको हकहितका लागि महासंघ कटिबद्ध रहेको बताए । भण्डारीले निकट भविष्यमा महासंघले पत्रकारिता विषय पढ्न चाहने एक महिला र एक पुरुष पत्रकारलाई छात्रवृत्ती दिइने घोषणा पनि गरे ।
सो क्रममा बाँकेका प्रमुख जिल्ला अधिकारी शिवराम गेलाल, पत्रकार महासंघका लुम्बिनी प्रदेश उपाध्यक्ष शुक्रऋषि चौलागाई, जिल्ला प्रहरी कार्यालय बाँकेका प्रमुख श्यामकृष्ण अधिकारी, पत्रकार महासंघका पुर्वकेन्द्रिय सदस्य झलक गैरे, पुर्वशाखा अध्यक्षद्धय निरज गौतम र रुद्र सुवेदी, महासंघका सल्लाहकार डक्टप्रसाद धिताल, नेपाल प्रेस युनियन बाँकेका अध्यक्ष अर्जुन ओली, प्रेस चौतारी बाँकेका अध्यक्ष हेमन्त बि.क, प्रेस मञ्चका केन्द्रिय उपाध्यक्ष आशिष गुप्ता, राष्ट्रिय मानव अधिकार आयोग नेपालगन्जका प्रमुख झंक रावल, नेपाल बार एशोसियनका बरिष्ठ उपाध्यक्ष सुनिल श्रेष्ठ, इन्सेकका भोला महत, बाँके राष्ट्रिय निकुञ्जका प्रमुख संरक्षण अधिकृत श्यामकुमार शाह लगायतले शुभकामना मन्तब्य दिएका थिए । कार्यक्रम सञ्चालन महासंघ बाँकेका सचिव कमल डाँगीले गरेका थिए ।
