बाँके(अगैया) : बाँकेको राप्ती सोनारी गाउँपालिका क्षेत्रका कोरोना संक्रमित ब्यक्तिलाई राहत रकम वितरण सुरु गरिएको छ । गाउँपालिका कार्यालयले आइतबारबाट जनही ५ हजार रुपैयाँका दरले वितरण सुरु गरेको हो । गाउँपालिकाले केही महिनाअघि कोरोना संक्रमित भएका ब्यक्तिलाई राहत रकम प्रदान गर्ने निर्णय गरेको थियो । यसअघि गाउँपालिकाले कोरोना संक्रमणबाट मृत्यु भएका ब्यक्तिका परिवारलाई किरिया खर्च वापत जनही २० हजार तथा राहत स्वरुप एक लाख रुपैयाँ प्रदान गरिसकेको छ ।
कोरोना महामारीका बेला राप्ती सोनारी गाउँपालिका वडा नम्बर ८ मा सञ्चालित आइसोलेशन सेन्टर अवलोकन गर्दै जनप्रतिनिधी लगायत । फाइल तस्बिर : दूरसञ्चार
गाउँपालिका अध्यक्ष लाहुराम थारुले मुत्युको शैयाबाट फर्केका कोरोना संक्रमित ब्यक्तिलाई हौसला प्रदान गर्न र सर्बसाधारणलाई कोरोना परिक्षणका लागि अभिप्रेरित गर्ने उद्देश्यले रकम प्रदान गरिएको बताए । कोरोना संक्रमितलाई रकम दिनेमा राप्ती सोनारी सम्भवतः देशकै पहिलो गाउँपालिका भएको उनको दाबी छ ।
गाउँपालिकाले आइतबार पहिलो दिन मात्रै कोरोना संक्रमित भएर निको भएका ८० जना ब्यक्तिलाई ४ लाख रुपैयाँ वितरण गरेको अध्यक्ष थारुले जानकारी दिए । गाउँपालिका क्षेत्रभित्र ७ सय ५० जना कोरोना संक्रमित ब्यक्ति रहेको तथ्यांक गाउँपालिकासँग छ । ‘सकभर दसैँ अगाडी नै सबै ब्यक्तिलाई रकम वितरण गर्ने हाम्रो योजना छ,’ उनले भने ‘सबैलाई वितरण गर्दासम्म ३७ लाख ५० हजार जति खर्च हुने हाम्रो अनुमान छ ।’
कोरोना महामारीका बेला राप्ती सोनारी गाउँपालिका वडा नम्बर ३ मा सञ्चालित आइसोलेशन सेन्टर । फाइल तस्बिर : दूरसञ्चार
गाउँपालिकाले यसअघि कोरोना संक्रमणबाट मृत्यु भएका २३ जना ब्यक्तिका परिवारलाई किरिया खर्च वापत २० हजार र राहत स्वरुप एक लाख रुपैयाँ प्रदान गरिसकिएको अध्यक्ष थारुले स्मरण गराए । ‘हामीले मृतकका परिवारलाई किरिया खर्च र राहत रकम प्रदान गरिसकेका छौंं,’ उनले भने ‘कोरोना संक्रमित भएर निको भएपनि उनीहरु मृत्युको शैयाबाट बाँचेर फर्केका हुन्, उनीहरुको पनि उपचारका क्रममा गाडीभाडा, फलफुल, औषधी उपचारमा थुप्रै पैसा खर्च भएको छ, त्यसमा थोरै भएपनि राहत मिलोस् भन्ने पनि हो ।’
बन्दाबन्दीका कारण राजमार्गमा अलपत्र पैदल यात्रीको उद्दारका क्रममा गाउँपालिका अध्यक्ष लाहुराम थारु । फाइल तस्बिर : दूरसञ्चार
गाउँपालिका अध्यक्ष थारु पनि कोरोना संक्रमित भएर निको भएका थिए । उनीसहित उपाध्यक्ष धनीकुमारी खत्री तथा वडाका जनप्रतिनिधी र थुप्रै कर्मचारी संक्रमित भएर निको भएका थिए । राप्ती सोनारी–६ का वडासदस्य तारा कसेराको त कोरोना संक्रमणबाटै मृत्यु भयो । आफु स्वयं कोरोना संक्रमित भएर निको भएको र अझै स्वास्थ्यमा पूर्ण रुपले सुधार नआएको उनले सुनाए ।
‘यो रकम मृत्युको शैयाबाट बाँचेर फर्केका ब्यक्तिलाई हौसला प्रदान गर्नलाई हो, अर्को कुरा गाउँपालिकाले कोरोना संक्रमितलाई पनि पैसा दिन्छ भन्ने थाहा पाएपछि कोरोना परिक्षण गराउनेको संख्या बढ्न सक्ने र त्यसले कोरोना महामारी नियन्त्रणमा पनि सहयोग पुग्ने हामीलाई विश्वास छ,’ थारुले भने ‘पहिला त गाउँपालिकाले पैसा दिन्छ भनेर कसैलाई विश्वास थिएन, अहिले जब पैसा पाउन थाले, धेरै जना ब्यक्तिहरु सम्पर्कमा आउन थालेका छन् ।’
बाँकेको अगैयास्थित राप्ती सोनारी गाउँपालिका कार्यालय । तस्बिर : दूरसञ्चार
