मुगुको बस दुर्घटनामा मृत्यु हुनेको संख्या ३२ पुग्यो, १२ जनाको नेपालगन्जमा उपचार गरिदै

समाज

Home
समाज
मुगुको बस दुर्घटनामा मृत्यु हुनेको संख्या ३२ पुग्यो, १२ जनाको नेपालगन्जमा उपचार गरिदै

मुगुको बस दुर्घटनामा मृत्यु हुनेको संख्या ३२ पुग्यो, १२ जनाको नेपालगन्जमा उपचार गरिदै

नेपालगन्ज : मुगुको भएको यात्रुबाहक बस दुर्घटनामा मृत्यु हुनेको संख्या ३२ पुगेको छ । सुर्खेतबाट मुगु जादै गरेको भे १ ख ३१६७ नम्बरको बस मंगलबार दिउँसो १ बजेर ४५ मिनेटमा मुगुको छायाँनाथ रारा नगरपालिका वडा नम्बर ७ पिनाटपाने खोलामा दुर्घटनामा परेको थियो ।

कर्णाली प्रदेश प्रहरी कार्यालयका प्रहरी निरीक्षक जीवन लामिछानेका अनुसार २४ जनाको घटनास्थलमा, चार जनालाई उपचारका लागि घटनास्थलबाट विमानस्थल पुर्याउँदै गर्दा र थप चार जनाको नेपालगन्जमा उपचारका क्रममा मृत्यु भएको हो ।

उपचारका लागि नेपालगन्ज ल्याइएका १६ जना मध्ये ४ जनाको मृत्यु भएको प्रहरीले जनाएको छ । उनले भने, ‘२४ जनाको घटनास्थलमै मृत्यु भएको थियो, अन्य चार जनालाई घटनास्थलबाट विमानस्थल पुर्याउँदै गर्दा मृत्यु भयो, बाँकी घाइते १६ जनालाई नेपालगन्ज पठाएकोमा ती मध्ये थप ४ जनाको पनि मृत्यु भएको जानकारी प्राप्त भएको छ,’ उनले भने ‘दुर्घटनामा अहिलेसम्म ३२ जनाको मृत्यु भइसकेको जानकारीमा आएको छ ।’

घटनास्थलमा १६ जना पुरूष, ७ महिला र १ जना बालकको मृत्यु भएको थियो । नेपालगन्जमा अहिले बाँकी १२ जना घाइतेको उपचार भइरहेको प्रहरीले जनाएको छ । घाइतेलाई समिट एअरमार्फत नेपालगन्ज ल्याइएको हो ।

दुर्घटनामा घाइते भएकी एक जना बालिकाको मुगुस्थित जिल्ला अस्पतालमै उपचार भइरहेको छ । घाइतेका अनुसार ३ जनाले गाडीबाटै हाम फालेका थिए । यस्तै २ जना दुर्घटना हुनुभन्दा केही समय अगाडी मात्रै ओर्लिएका थिए । प्रहरीका अनुसार बसमा ४९ जना सवार रहेका थिए ।

प्रकाशित मिति: मंगलबार, असोज २६, २०७८ १८:१४

प्रतिक्रिया दिनुहोस्