नेपालगन्ज : सातौँ प्रादेशिक औद्योगिक लघु, घरेलु तथा कृषि, व्यापार एवम् पर्यटन महोत्सव मंगलबारबाट सञ्चालनमा आएको छ । नेपालगन्जको वाटरपार्कमा महोत्सवको एक भब्य समारोहका बीच उद्घाटन गरियो । कार्यक्रमका प्रमुख अतिथी एवम् लुम्बिनी प्रदेशका पूर्वमन्त्री कृष्णा केसी ‘नमूना’ले महोत्सव उद्घाटन गरिन् । महोत्सव उद्घाटन गर्नुअघि सहिद सेतु बिक चोकबाट बाजागाजासहित झाँकी निस्केको थियो ।
आर्थिक गतिविधिलाई चलायमान गर्ने उद्देश्यका साथ नेपालगन्जको वाटरपार्कमा उक्त महोत्सव आयोजना गरिएको हो । नेपाल घरेलु तथा साना उद्योग महासंघ बाँकेकी अध्यक्ष मधु खड्काको सभापतित्वमा भएको उक्त कार्यक्रममा महासंघ नेपालगन्ज नगर समितिकी अध्यक्ष दिला शाहले स्वागत गरेकी थिइन् ।
महासंघ बाँकेका महासचिव जिआर भुसालले सञ्चालन गरेको उक्त कार्यक्रममा पूर्वमन्त्री नमूनासहित लुम्बिनी प्रदेश सभा सदस्य मिना श्रेष्ठ, नेपालगन्ज उपमहानगरपालिकाका निर्वतमान उपमेयर उमा थापामगर(चन्द), नेपाल घरेलु तथा साना उद्योग महासंघका केन्द्रीय अध्यक्ष उमेशप्रकाश सिंह लगायतले आर्थिक गतिविधी चलयमान गराउन यस्ता महोत्सव कोषेढुंगा सावित हुने बताए ।
स्थानीय उत्पादन र पर्यटन प्रर्वद्धनसँगै बजारीकरणमा उल्लेख्य सहयोग पुग्ने महोत्सव सफलताको शुभकामना पनि दिए । यही चैत १८ गतेसम्म सञ्चालन हुने महोत्सवमा १ सय ७५ वटा स्टल बुक भइसकेका छन् । जसमध्ये व्यवसायिकका ९०, घरेलुका ५०, प्रायोजकका ८, थारु गाउँका १२ र होटल सम्बन्धी १५ स्टल रहेका छन् । महोत्सव अवलोकनका लागि एक सय रुपैयाँ प्रवेश शुल्क राखिएको छ । बिद्यार्थीका लागि ५० प्रतिशत छुटको व्यवस्था गरिएको छ ।
भोलि ज्योती मगरले स्टेज तताउने
महोत्सवको दोस्रो दिन बुधबार (भोलि) चर्चित गायिका तथा मोडल ज्योती मगरको बेजोड प्रस्तुती रहने भएको छ । मेहनत सृजना उत्पादन र बस्तुः मेरै नेपालको भन्ने मूल नाराका साथ सञ्चालित महोत्सवको दोस्रो दिन ज्योतीले आफ्नो प्रस्तुती देखाउने महोत्सवका प्रचार-प्रसार संयोजक इन्द्रबहादुर खत्रीले जानकारी दिए ।
ज्योती मगरका साथै गायक कमल बिसी ‘माल्दाई’ र सपना शाहीको पनि प्रस्तुती रहने भएको छ । यस्तै पुरुषोत्तम सापकोटा र रुपा घर्ती मगरको जोडीले कार्यक्रममा उद्घोषण गर्नेछन् । नेपाल घरेलु तथा साना उद्योग महासंघ जिल्ला कार्यसमिति (महिला उद्यमी समिति) बाँकेको आयोजना, महासंघ नेपालगन्ज नगर समिति सहआयोजक रहेको उक्त महोत्सवलाई मुख्य प्रायोजन होटल बाटिका, प्रायोजक नेपाल टेलिकम र संरक्षकमा नेपालगन्ज उपमहानगरपालिका रहेको छ ।
महोत्सवकै क्रममा होली पर्ने भएकाले चैत १२ गतेका दिन होली उत्सव कार्यक्रम राखिएको छ । होली उत्सवका दिन नेपाली सिने जगतका ख्याती प्राप्त कलाकार पल शाहलाई आमन्त्रण गरिएको छ । तराई क्षेत्रमा गर्मी बढ्न थालेको अवस्थालाई ध्यानमा राखेर महोत्सव साँझ ८ बजेसम्म सञ्चालन हुने जनाइएको छ । महोत्सवमा दुई करोड बढीको कारोबार तथा दुई लाख बढी दर्शक अवलोकन गर्न आउने अपेक्षा गरिएको छ ।
