नेपालगन्ज : नेपालगन्जको वाटरपार्कमा जारी महोत्सवको छैठौं दिन आईतबार गायिका पूर्णकला बिसीले दर्शकलाई छमछमी नचाएकी छन् । उनले ‘दिल मेरो चोरी लग्यो पुलिस वालाले, बुटवल बजार तुल्सीपुर हुँदै जाउँला सल्यान’ लगायतका चर्चित गित गाएर दर्शकलाई छमछमी नचाएकी हुन् ।
आफ्नो साँगितिक प्रस्तुती राख्दै गर्दा दर्शक दिर्घामा रहेका दर्शकहरुले हुटिङ्ग गर्दै गीतसँगै ताल मिलाएर छमछमी नाचे । यस्तै मोडल निशु श्रीपालीले विभिन्न गितमा आफ्नो दमदार प्रस्तुती राख्दा दर्शकहरु प्रफुल्ल बने । महोत्सवमा दिनहुँ आयोजना हुने साँगितिक कार्यक्रममा स्थानीय तथा राष्ट्रिय कलाकारको बेजोड प्रस्तुती हुने गरेको छ ।
साँगितिक कार्यक्रमले दर्शकको सहभागिता समेत बढाउँदै लगेको छ । अन्य दिनभन्दा आईतबार पनि दर्शकहरुको उल्लेख्य सहभागिता रह्यो । दिनहुँ स्थानीय तथा राष्ट्रिय चर्चित कलाकारको प्रस्तुती हेर्न आउने दर्शकको संख्या बढ्दै गएपछि दर्शकलाई थप रोमाञ्चित र व्यस्त बनाउन आयोजक लागि परेको छ । आगामी चैत्र १८ गतेसम्म सञ्चालन हुने महोत्सवमा आइतबार चर्चित गायक प्रमोद खरेल तथा चर्चित गायिका एवम उद्घोषिका शोभा त्रिपाठीको भने उपस्थिती हुन सकेन ।
काठमाण्डौंबाट आउने जहाज मौसमका कारण ढिलो भएपछि कार्यक्रममा उपस्थित हुन नसकेको आयोजकले जनाएको छ । आयोजक घरेलु तथा साना उद्योग महासंघ बाँकेका मधु खड्काले दिएको जानकारी अनुसार उक्त महोत्सवमा १ सय ७५ स्टल प्रर्दशनीमा राखिएको छ । जसमध्ये व्यवसायिकका ९०, घरेलुका ५०, प्रायोजकका ८, थारु गाउँका १२ र होटल सम्बन्धी १५ वटा स्टल रहेका छन् ।
महोत्सव अवलोकनका लागि टिकटको मूल्य १ सय राखिएको छ । बिद्यार्थीका लागि ५० प्रतिशत छुटको व्यवस्था गरिएको छ । साथै महोत्सवमा बिहान १० बजेदेखि नै स्थानीय तथा राष्ट्रिय कलाकारको प्रस्तुती रहने गरेको छ ।
महोत्सव १३ गतेदेखि निरन्तर चल्ने
महोत्सवको सातौं दिन सोमबार (भोलि) महोत्सव सञ्चालन नहुने भएको छ । जिल्ला प्रशासन कार्यालय बाँकेले जिल्लाको शान्ति, सुरक्षालाई मध्यनजर गर्दै होलीको दिन (चैत १२ गते) महोत्सव सञ्चालन नगर्न आदेश दिएका कारण एक दिन महोत्सव स्थगित गर्नु परेको महासंघ बाँकेकी अध्यक्ष खड्काले बताइन् ।
आयोजकले उक्त दिन चर्चित नायक पल शाहलाई ल्याएर होली खेल्ने योजना बनाएपछि शान्ति सुरक्षाको चुनौतीलाई मध्यनजर गर्दैै प्रशासनले एक दिनका लागि महोत्सव सञ्चालनमा रोक लगाएपछि पल शाहसँग होली खेल्ने अपेक्षा पुरा हुन नसकेको र आयोजकलाई ठूलो आर्थिक क्षति पुग्न गएका अध्यक्ष खड्काले प्र्रेस विज्ञप्ती मार्फत उल्लेख गरेकी छन् ।
आयोजकले चैत १३ गतेदेखि पूर्वनिर्धारित सम्पूर्ण कार्यक्रम नियमित हुने जनाउँदै महोत्सवलाई भब्य र सभ्य रुपमा सफल बनाउन उद्योगी, व्यवसायी, राजनीतिक दल, संघ संस्था, सञ्चारकर्मी, सर्मथक, शुभेच्छुक, सुरक्षाकर्मी र जिल्लाबासी समक्ष आग्रह गरेको छ ।
