देउखुरी : नेपाल पत्रकार महासंघ लुम्बिनी प्रदेशले एक करोड रुपैयाँको बृहत पत्रकार कल्याण कोष स्थापना गर्ने भएको छ । महासंघको कार्यसमिति बैठकले यस्तो निर्णय गरेको हो । प्रदेश समिति अध्यक्ष शुक्रऋषि चौलागाईंको अध्यक्षतामा सम्पन्न भएको बैठकले पत्रकारको समग्र कल्याण र हितका लागि कोष स्थापना निर्णय गरेको महासचिव पाण्डवप्रसाद शर्माले विज्ञप्तीमार्फत जानकारी दिएका छन् ।
कल्याण कोष अभिवृद्धिका लागि तीनै तहका सरकार, विभिन्न दाता, शुभेच्छुक र पत्रकार साधारण सदस्यहरूसँग अपिल गर्ने निर्णय गरिएको छ । महासंघलाई रणनीतिक, प्रभावकारी र व्यवस्थित रूपमा सञ्चालन गर्दै दीर्घकालीन उद्देश्य प्राप्त गर्न अध्यक्ष चौलागाईलाई वार्षिक कार्ययोजना ल्याउने बैठकले जिम्मा दिएको छ ।
उक्त बैठकले लुम्बिनी प्रदेशस्तरीय सञ्चार प्रशिक्षण केन्द्र स्थापना गर्ने निर्णय समेत गरेको छ । प्रशिक्षण केन्द्र स्थापनाका लागि संघीय, प्रदेश र स्थानीय सरकारसँग बजेटका लागि पहल गर्ने निर्णय गरिएको छ । समितिको निर्णय प्रक्रियालाई छरितो र प्रभावकारी बनाउनका लागि पदाधिकारी रहने गरी सचिवालय गठन गर्ने निर्णय पनि भएको महासचिव शर्माले बताए ।
त्यस्तै लुम्बिनी प्रदेश सरकार आन्तरिक मामिला तथा कानून मन्त्रालय अन्तर्गत गठित प्रदेश सञ्चार समन्वय परिषद्लाई क्रियाशील बनाउन पहल थाल्न सम्बद्ध मन्त्रालयलाई जोडदार माग गरिएको छ । प्रदेश र स्थानीय तहलाई सञ्चारमैत्री कानून र कार्यक्रम ल्याउन आग्रह गर्ने निर्णय समेत गरिएको छ ।
महासंघको कामलाई थप प्रभावकारी बनाउन उपाध्यक्ष रामप्रसाद आचार्यको संयोजकत्वमा कार्यक्रम तथा प्रकाशन विभाग, उपाध्यक्ष मीना ढकालको संयोजकत्वमा महिला विभाग र महासचिव पाण्डवप्रसाद शर्माको संयोजकत्वमा संगठन विभाग गठन गरिएको छ ।
उक्त बैठकले आगामी नयाँ वर्ष २०८२ को उपलक्ष्यमा क्यालेन्डर प्रकाशन गर्ने निर्णय पनि गरेको छ । क्यालेन्डर प्रकाशनका लागि सचिव गोविन्द प्रसाद शर्माको संयोजकत्वमा कोषाध्यक्ष प्रेमनारायण आचार्य, सदस्यहरू तेजेन्द्र केसी, प्यार अलि खाँन र सीता पाण्डेलाई जिम्मेवारी दिइएको विज्ञप्तीमा उल्लेख छ ।
