नेपालगन्ज : नेपालगन्जमा सञ्चालित 'प्रादेशिक महोत्सव-२०८१' को चौथो दिन आइतबार नायक पल शाहको क्रेजमा दर्शकको ओइरो नै लागेको छ । कालो पहिरनमा कालो चस्मा लगाएर टिमसहित स्टेजमा उक्लेका नायक पल शाहले हजारौं दर्शकमाझ आधा दर्जन गीतमा नृत्य प्रस्तुत गरे ।
मायालाई पानको पात.., म त ढले ढले...लगायतका चर्चित गीतमा नृत्य गर्दा युवा युवती निकै झुमेर नाचेका थिए । नायक शाहले क्रेजी दर्शकलाई आफ्नो आगामी १४ फागुनमा रिलिज हुन लागेको चलचित्र मायवीको प्रचारमा दर्शकलाई टिसर्ट उपहार दिएका थिए । क्रेजी दर्शकले मञ्चमै उक्लेर सम्मान गरेका थिए ।
आइतबार नायक शाह अघि चर्चित गायिका शान्ति श्रीको प्रस्तुती रहेको थियो । गायिका शान्तिश्रीले आफ्ना लोकप्रिय गीत रुकुमैकोट..., बन्दीपुरैमा..., अरेली काँडैले लगायतका आधा दर्जन बढी गीत गाएकी थिइन् । चिसो नेपालगन्जमा पारिलो घाम लागिरहेकोे बेला हरियो सारीमा ठाटिएकी शान्तिश्रीको गीतमा युवायुवती झुमेका थिए ।
अर्की गायिका दुःखसँगै सुख बाँडी.., दुई मुटु.., मरे भनें मरेको पल..., अलि अलि हँसाउँछु...लगायतका गीत प्रस्तुत गरिन् । साँस्कृतिक व्यवस्थापन समितिका संयोजक मख्खन बहादुर धामीका अनुसार महोत्सवको पाँचौ दिन सोमबार चर्चित गायक दुर्गेश थापा, हास्यव्यंग्य कलाकार तथा अभिनेता दीपकराज गिरी, दीपाश्री निरौलाको पनि प्रस्तुती हुने भएको छ ।
बाल गायक सुप्रिम मल्ल, लोक दोहोरी गायिका इब्सल सन्ज्याल र लोक दोहोरी गायक अर्जुन सापकोेटा आउने कार्यक्रम रहको संघले जनाएको छ । महोत्सव प्रचार समितिका संयोजक डम्बरबहादुर चन्दले आइतबार पनि दर्शकको संख्या निकै उत्साहजनक रहेको बताए । उनले अब हरेक दिन दर्शक संख्या बढ्ने दाबी गरे ।
चौथो दिन पनि एकल नृत्य प्रतियोगिता र विभिन्न जातीय पहिचानका साँस्कृतिक कार्यक्रम भएको थियो । महोत्सवका साँस्कृतिक उपसमितिका वरिष्ठ सल्लाहकार सुन्दर गुरुङका अनुसार आइतबार पनि जिल्लाका थप सात वटा विद्यालयका प्रतिस्पर्धीहरुले प्रथम चरणका प्रस्तुती दिएका छन् ।
महोत्सवको मुख्य आयोजक नेपालगन्ज उद्योग वाणिज्य संघ, बाँके, आयोजक नेपाल उद्योग वाणिज्य महासंघ काठमाडौं, सह आयोजक नेपाल उद्योग वाणिज्य महासंघ लुम्बिनी प्रदेश र क्यान महासंघ बाँके शाखासँग सहकार्य भएको छ ।
