नेपालगन्ज : बाँकेको नेपालगन्जमा रहेको दारुल उलुम फैजुन्नबी जामा मस्जिद इदगाह सञ्चालक समितिले पूर्णता पाएको छ । मस्जिदका निर्वतमान अध्यक्ष फिदा हुसेन अन्सारी नेतृत्वको समितिले राजिनामा दिएपछि लामो समयदेखि नेतृत्व विहिन रहेको जामा मस्जिद इदगाह सञ्चालक समितिमा तदर्थ समितिका अध्यक्ष एवम नेपालगन्ज-३ का वडाअध्यक्ष समेत रहेका मोहम्मद अयुव सिद्धिकीले ८ महिना सम्म पनि निर्वाचन गराउन नसकेपछि मुस्लिम समुदाय आन्दोलित हुदै आएका थिए ।
मुस्लिम समुदायले निरन्तर आन्दोलन गरेपछि जिल्ला प्रशासन कार्यालय बाँकेले सर्वपक्षिय बैठकको निर्णय अनुसार संस्था दर्ता ऐन, २०३४ अनुसार रहमान मियाँको अध्यक्षतामा १७ सदस्य समिति गठन गरिएको हो । असन्तुष्ट पक्ष र राजनीतिक दलका नेताको रोहवरमा बसेको सर्वपक्षिय बैठकले समितिलाई पूर्णता दिएको हो ।
नव गठित समितिको अध्यक्षमा रहमान मियाँ, उपाध्यक्षमा रौनक अली इद्रिसी, महासचिव ऐनुद्दीन अन्सारी, सह–सचिवमा अब्दुल अजिज काजी अन्सारी र कोषाध्यक्षमा मोहम्मद हुसेन हल्वाई सर्वसम्मत छानिएका छन् । यस्तै सदस्यहरुमा आलम खान, मोहम्मद सरिफ बागवान, अब्दुल गफ्फार खाँ (चाँद), हाजी यासिन, निजाम अली इद्रिसी, कारी सगिर खाँ, रहिस हल्वाई, सुफियान सल्मानी, सहबुद्दिन हल्वाई, इसहाक सिद्धिकी, सगीर खाँ र सलाहुद्दिन हल्वाई रहेका छन् ।
समितिले पूर्णता पाएपछि मस्जिदको संरक्षण तथा सम्वद्र्धन र भेटीघाटी पारदर्शी हुने जिल्ला प्रशासन कार्यालय बाँकेका प्रशासकीय अधिकृत बिनिता यादवले विश्वास व्यक्त गरिन् । मस्जिदमा विगतमा भएको अनियमिताका विषयमा जिल्ला प्रशासन कार्यालय बाँकेले छानविन गरी आवश्यक कारवाही गर्ने जनाएको छ ।
