जुम्ला : नेपाल कम्युनिस्ट पार्टीका महासचिव नेत्रविक्रम चन्द ‘विप्लव सी’ले जुम्लामा स्याउका विरुवा राेपेका छन । जुम्लाको हिमा गाउँपालिका -७ धौलापानीमा करिव १३ हजार वर्गमिटर क्षेत्रफल जमिनमा २ हजार स्याउका बिरुवा र ४ सय दाँते ओखरका बिरुवा रोपेर उनले उद्घाटन गरे ।
राजनीतिक क्रान्तिसँगै आर्थिक क्रान्तिलाई नजोडेसम्म देशको स्वाधीनता र आत्मनिर्भर सम्भव नहुने विप्लवले बताए। उनले पहिला नेता र कार्यकर्तालाई कृषि उत्पादनमा जोड्ने र त्यसपछि देशभरका जनतालाई कृषि क्रान्तिमा जोडेर देशलाई आत्मनिर्भर बनाउने योजना रहेको सुनाए ।
विप्लवले हावापानी र मौसमअनुसारको फलफूल बालीनाली उत्पादन गरिरहेको बताउँदै भने‘अहिले हाम्रा नेता कार्यकर्तालाई देशैभर खानकै लागि कहिँ कतै माग्नुपर्ने अवस्था छैन, देशैभर सबै नेता कार्यकर्ता उत्पादनमा लागेका छौँ ।’ महासचिव विप्लवले जगा उपलब्ध गराउने हिमा गाउँपालिका - ७ धांचुगाउँकी कृष्ण कौरा शाहीलाई धन्यवाद पनि दिए ।
उनले भने ‘उनी शहीद परिवार पनि हुनुहुन्छ, उनले हामीलाई जग्गा उपलब्ध गराउनुभयो, विशेष धन्यवाद छ।उत्पादन वृद्धि नभइ मुलुक र जनताको समृद्धि सम्भव नहुने कुरामा विश्वास राख्दै विप्लवले कृषि क्रान्तिको यात्रालाई कर्णालीको जुम्लामा पुर्याएको बताए।‘उर्बर बाँझो जग्गालाई उपभोग गरिने छ,’ जुम्ला पुगेका विप्लवले भने, ‘यसले किसानहरुमा पनि सकारात्मक सन्देश प्रवाह गर्ने छ। हामी गरेर देखाउने छाैँ,उत्पादन वृद्धिबाट मात्रै समाज र राष्ट्रको उन्नति सम्भव छ । त्यसैलाई मध्यनजर गरी उर्वर जुम्लाको बाँझो भूमिलाई उपभोग गर्न र स्याउमार्फत समृद्धि हासिल गर्न खेती गर्न लागिएको हो ।’
तीनै तहका सरकारले उत्पादनशील क्षेत्रमा लगानी गर्न नसकेको उनको ठम्याइ छ । ‘अब सबै पार्टीले गाउँगाउँमा उत्पादन वृद्धिका लागि जाँगर चलाउने अभियान ल्याउन जरुरी छ,’ उनले भने, ‘हाम्रो पार्टी अब उत्पादन वृद्धिका क्षेत्रमा बढी केन्द्रित हुन्छ ।’
