नेपालगन्ज : उपप्रधान एवं शहरी विकास मन्त्री प्रकाशमान सिंहले आउँदो निर्वाचन कांग्रेसकै नेतृत्वमा हुने विश्वास व्यक्त गरेका छन् । ‘निर्वाचन कांग्रेसकै नेतृत्वमा हुने कुरामा हामी विश्वस्त होऔं, निर्वाचन हुनु भन्दा अगाडि पार्टीको संगठन बनाऔँ, बुथ कमिटीदेखि माथीसम्म संगठन बनाऔँ,’ बाँकेका कांग्रेस कार्यकर्तालाई मंगलबार सम्बोधन गर्दै भने ‘निर्वाचनमा मेसिन नै पार्टी संगठन हो, आम मतदातासम्म पुग्नलाई संगठन चाहिन्छ ।’
अर्को प्रसंगमा कांग्रेसका नेता समेत रहेका सिंहले पार्टीका हरेक काम गर्दा कांग्रेसलाई केन्द्रविन्दुमा राखेर काम गर्नुपर्ने बताए । ‘हामीमा राजनीतिक संस्कार हुनुपर्यो, नेताहरूले सिकाएको कुरालाई सबैले पालना गर्नुपर्यो,’ कांग्रेस नेता सिंहले भने, ‘कांग्रेस जिम्मेवार पार्टी हो, हामी पनि जिम्मेवार बन्नुपर्छ ।’
राजनीतिक स्थायित्व दिनु वर्तमान सरकारको मुख्य काम रहेको सिंहले बताए । राजनीतिक स्थायित्व भएपछि मात्र विकास निर्माण लगायतका काम गर्न सकिने उनको भनाई छ । संघियताको भावना अनुरूप वर्तमान सरकार बनेको प्रष्ट पारे । यो सरकार धेरै ठूलो काम गर्नलाई आएको होइन, राजनीतिक स्थायित्व दिनको लागि आएको हो,' सिंहले भने ।
पार्टीको तर्फबाट नेतृत्व गरेर आफू उपप्रधानमन्त्रीसहित शहरी विकास मन्त्री भएको स्मरण गराउँदै सिंहले भने, ‘म उपप्रधानमन्त्री हुँदैमा तपाईंहरूको सबै काम तुरुन्तै नहुन सक्छ, प्रक्रिया हुन्छ ।’ नेपाली कांग्रेस बाँकेका सभापति नारायणप्रसाद गौडेलको सभापतित्वमा सम्पन्न भएको कार्यक्रममा पार्टीका केन्द्रिय सहमहामन्त्री किशोरसिंह राठौंर लगायतले पनि सम्बोधन गरेका थिए ।
