नेपालगन्ज : बाँकेको बेतहनीमा ट्यांकरले ठक्कर दिँदा दुई बालकको मृत्यु भएपछि उत्पन्न तनाव साम्य भएको छ । डुडुवा गाउँपालिका वडा नम्बर २ बेतहनी चोकमा आइतबार अपरान्ह साढे ३ बजेतिर भे १ ख ४१०७ नम्बरको पानी बोक्ने ट्यांकरले ठक्कर दिँदा ९ वर्षका विशाल गोडिया र ७ वर्षीय शिवकुमार गोडियाको घटनास्थलमै मृत्यु भएको थियो । स्थानीयका अनुसार दुबै जना सहोदर दाजुभाई हुन् ।
मृतक दाजुभाई बेतहनीमा रहेको नौरीगढी ऐकेडेमीमा अध्ययनरत थिए । स्कुलबाट फर्किदै गर्दा बेतहनी चोकमा ट्यांकरले उनीहरूलाई ठक्कर दिएको थियो । प्रहरीका अनुसार ठक्करबाट दाजुभाईको तत्कालै मृत्यु भएको थियो । घटनापछि स्थानीय बासिन्दाले ट्यांकर र प्रहरी चौकी बेतहनीमा आगजनी गरेका थिए ।
आगजनीबाट ट्यांकरमा पूर्ण रुपले जलेको छ, भने प्रहरी चौकीमा आंशिक रुपमा क्षति भएको छ । उक्त क्षेत्र करिव चार घण्टासम्म अवस्था तनावपूर्ण रह्यो । प्रहरी र स्थानीय बासिन्दाबीच झडप भएको थियो । स्थानीयले चालकलाई सार्वजनिक गर्नुपर्ने र आफुहरुलाई जिम्मा लगाउनुपर्ने माग राखेका थिए । तर, प्रहरीले सुरक्षाका लागि चालकलाई प्रहरी चौकीमा लगेर राखेपछि स्थानीयहरु प्रहरीमाथी आक्रोशित भएका हुन् ।
घटनास्थलमा थप संख्यामा नेपाल प्रहरी र सशस्त्र प्रहरी परिचालन भएपछि स्थिती नियन्त्रणमा आएको जिल्ला प्रहरी कार्यालय बाँकेले जनाएको छ । घटनास्थलदेखी करिव ३ किलोमिटर टाढा पुरैना बिर्ता क्षेत्रमा प्रहरीका सवारी साधनहरु रोकेर सुरक्षा जनशक्ती परिचालन गरिएको छ । जिल्ला प्रहरी कार्यालय बाँकेका प्रवक्ता एवम प्रहरी नायव उपरीक्षक (डिएसपी) दिपक पातलीले ट्यांकरको ठक्करबाट दुई जना बालकको घटनास्थलमै मृत्यु भएपछि करिव ४ घण्टासम्म अवस्था तनावग्रस्त बनेको बताए । उनले अहिले स्थिती नियन्त्रणमा आईसकेको जानकारी दिए ।
‘अहिले अवस्था सामान्यतर्फ उन्मुख छ,’ उनले भने ‘सुरक्षाकर्मीको संख्या बढाएर घटनास्थललाई नियन्त्रणमा लिएका छौं ।’ स्थानीयले प्रहरी चौकीमा ढुंगामुढा गरेपछि प्रहरीले दर्जनौ सेल अश्रुग्याँस र हवाई फायर गरेको थियो । स्थानीयले प्रहरीहरुलाई लखेटेका थिए । त्यस क्रममा केही प्रहरी र स्थानीय बासिन्दा समेत घाइते भएका छन् । यो समाचार तयार पार्दासम्म बालकको शव सडकमै रहेको छ ।
यो पनि पढ्नुस् :
ट्यांकरको ठक्करबाट दुई बालकको मृत्युपछि बाँकेको बेतहनी तनावग्रस्त
हेर्नुस भिडियो :
