नेपालगन्ज : होटल पौवाले स्थापनाको नवौं वार्षिक उत्सवको अवसरमा घोषणा गरेको स्वाद उत्सवको तयारी पुरा भएको जनाएको छ । पौवा ब्यवस्थापनले नेपालगन्जमा शुक्रबार पत्रकार भेटघाट गर्दै यही चैत २५ गतेदेखि २९ गतेसम्म पौवाका सबै शाखामा आयोजना हुने स्वाद उत्सवको तयारी पुरा भएको जनाएको हो ।
स्वाद उत्सवमा नेपाली स्वाद सँस्कृति झल्किने मौलिक खानाको प्रस्तुति हुने पत्रकार भेटघाटमा जानकारी दिइएको छ । नवौं वार्षिक उत्सवको अवसरमा देशभरका शाखाहरूमा विभिन्न कार्यक्रम सहित पौवाले स्वाद उत्सव मनाउन लागेको हो । होटल पौवाका अनुसार उत्सव मार्फत पौवाले नेपाली स्वाद, सँस्कृति र आतिथ्य संस्कारलाई राष्ट्रिय तथा अन्तर्राष्ट्रिय स्तरमा चिनाउने लक्ष्य राखेको छ । उच्च आतिथ्यता प्रदान गर्दै मौलिक स्वादको अनुभव पाहुनाहरूसमक्ष पुर्याउने यस कार्यक्रमको मुख्य लक्ष्य रहेको छ ।
यसैगरी स्वाद उत्सवको उद्देश्य पौवाका सेफहरूबीच नै स्वस्थ प्रतिस्पर्धा गराई बढीभन्दा बढी गुणस्तरीय खाना तयार पार्नु पनि रहेको होटल सञ्चालकहरुको भनाई छ । स्वाद उत्सवमा पाहुनाहरूले दिने प्रतिक्रियाले सेफहरूको अनुभवमा निखारता आई क्षमता अभिवृद्धि गर्न मद्दत पुग्ने पौवाका सिओओ कृष्ण गौतमले बताए ।
नवौं वार्षिक उत्सवका अवसरमा आयोजित स्वाद उत्सव देशभरका शाखाहरूमा एकैसाथ सञ्चालन हुने गौतमले बताए । उत्सवमा भाग लिनका लागि सबै शाखाबाट दुई लाख स्थानीय तथा बाह्य पाउनाहरूलाई प्रत्यक्ष भेट गरी निमन्त्रणापत्र दिइएको उनले जानकारी दिए । ती सबै पाहुनालाई पौवामा आएर खानाको निःशुल्क स्वाद लिन पाउनेगरी ब्यवस्था मिलाइएको गौतमले बताए ।
होटल पौवाका अध्यक्ष दुर्गाप्रसाद भण्डारीले पौवाले नेपालगन्जमा मात्र एक अर्बको हाराहारीमा लगानी गर्ने योजना बनाएको जानकारी दिए । पौवाको विस्तारमा अहिलेसम्म बिभिन्न बैंकहरुको ८५ करोड लगानी भएको जानकारी दिँदै अध्यक्ष भण्डारीले लगानीकर्ताहरुले झण्डै ४० करोड लगानी गरेको बताए । ‘जसरी विगतमा बाटोमा हिँड्ने बटुवाले आश्रय लिने स्थानलाई पाटी पौवा भन्ने गरिन्थ्यो, आकाशबाट झरी पर्दा होस् वा आँधीतुफान आउँदा पाटी पौवा बटुवाहरूका लागि ओत बस्ने सहारा बन्ने गर्दथ्यो, त्यसैगरी होटल पौवा देश विदेशका पाहुनाको ओत बनेको छ, पाहुनाहरूले दिएको विश्वास र समर्थनकै कारण पौवा ‘मिसन १००’ को लक्ष्य पच्छ्याउँदै देशभर विस्तारित भैरहेको छ,’ उनले भने ।
नेपालगन्जमा पाँचतारे होटल ‘पौवा वेस्टर्न’को पहिलो चरणको काम सम्पन्न भएको उनले जानकारी दिए । उनका अनुसार नेपालगन्जमा मुख्य आवास भवन निर्माण भैरहेको छ । अत्याधुनिक सभा हल तथा नेपाली रेस्टुरेन्ट सुरु भई सकेको छ । नेपालगन्जको होटलमा नेपाली हस्पिटालिटी भित्र अन्र्तराष्ट्रिय सुविधा रहने उनले बताए । होटल पौवा नेपालगन्जमा प्रबन्धक गिरिराज पाण्डेले नेपालगन्जमा सञ्चालन शाखामा फरक–फरक स्वाद र परिकारका पाँच वटा रेष्टुरेन्ट, चार वटा ठुलो सभा हलसहित १४ वटा मिटिङ हल, ७ वटा स्वीट रुम सहित ९६ वटा डिलक्स रुम उपलब्ध हुने जानकारी दिए । नेपालगन्जमा पहिलो होटलका रुपमा ९ तला सहितको एउटै छानामुनी क्यासिनो, स्पा, स्विमिङ, जिम सुविधा रहने उनले दाबी गरे ।
नेपाल पत्रकार महासंघ बाँकेका अध्यक्ष नवीन गिरीले आर्थिक मन्दीका बेला नेपालगन्जमा ठुलो लगानी भित्रिएकोमा पौवा टिमलाई धन्यवाद सहित सफलताको शुभकमना दिए । स्थापनाको ९ वर्षमा लुम्बिनी प्रदेशका प्रायः सबै पर्यटकीय स्थलमा पौवाको पहुँच पुगेको छ, भने छिमेकी कर्णाली प्रदेशको जुम्ला, गण्डकी प्रदेशको पोखरा, सुदुरपश्चिम प्रदेशको धनगढी तथा बाग्मती प्रदेशको काठमाडौं र सौराहामा पौवाको सेवा उपलब्ध छ ।
लुम्बिनी प्रदेशको रुपन्देहीको भैरहवाको चिल्ड्रेन पार्क र बुटवलको योगीकुटी, दाङको भालुवाङ, लमही र घोराही, कपिलवस्तुको गोरुसिङ्गेमा पौवाले समान र नेपालीपन सहितको सेवा दिइरहेको छ । त्यसैगरी पाल्पाको तानसेन र गुल्मीको रेसुङ्गामा पनि अन्र्तराष्ट्रिय स्तरको रिसोर्टसहित होटल सञ्चालनमा रहेको छ । त्यसैगरी सिन्धुलीको मुलकोट र खोटाङको हलेसीमा पनि पौवाको सेवा सञ्चालन भइसकेको छ ।
एक वर्षभित्र पाल्पाको झिँगामारामा पौवा बनवास रिसोर्ट सञ्चालनमा आउने पौवा व्यवस्थापनले जनाएको छ । कोशी प्रदेशमा होटल सञ्चालनको अध्ययन गरिरहेका तथा मधेश प्रदेशको जनकपुरमा सम्भाब्यता सहित होटल सञ्चालनको प्रारम्भिक तयारी गरिएको छ । यस्तै, गण्डकी प्रदेशमा पनि थप होटल सञ्चालनको अध्ययन थालिएको छ । सिन्धुली सदरमुकाममा नयाँ शाखा स्थापना हुन गैरहेको छ । अबको केही समयभित्रै पाल्पाको झिगामारामा पौवा बनवास रिसोर्ट समेत स्थापना हुँदैछ ।
स्थापनकालदेखि नेपाली हस्पिटालिटी दिने उद्घोष गर्दै पौवाका हरेक शाखाहरूमा नेपाली स्वाद, नेपालीपनको मनैदेखिको सत्कार, नेपाली कला र संस्कृतिलाई जगेर्ना गर्ने कार्यक्रमहरू हुँदै आएका छन । अन्तर्राष्ट्रिय जगतमा समेत ख्याती कमाएको नेपाली सत्कारलाई ब्राण्डिङ गर्दै हरेक शाखामा नेपाली पहिचान दिने सेवालाई थप समृद्ध बनाउने उद्देश्यका साथ पौवाले आफ्नो अभियानलाई अघि बढाइरहेको होटल पौवाका अध्यक्ष भण्डारीले बताए ।
‘नेपाली संस्कृति र संस्कार एवं नेपाली रैथाने स्वादको पहिचानलाई पौवाले लक्ष्य बनाएको छ । सबै धर्म, संस्कृति मान्ने नेपालीका विभिन्न चाडपर्वलाई पौवाले विशेष बनाउँदै आएको छ ।’ भण्डारीले भने । ‘देशलाई चिनाउने क्षेत्र पर्यटन क्षेत्र नै हो । हाम्रो डाँडापाखालाई सदुपयोग गर्ने हो भने रोजगारीको लागि विदेश पलायनलाई समेत कम गर्न सकिन्छ,’ अध्यक्ष भण्डारीले भने, ‘पौवाको प्रमुख लक्ष्य देशभित्रै रोजगारी सिर्जना गर्ने हो । पौवाले स्थानीय उत्पादनको समेत खपत गर्दै आएको छ जसले पौवा पुगेको स्थानमा आम्दानीको स्रोत समेत बिस्तार भएको छ ।’
