नेपालगन्ज : अस्पताल प्रशासनसँग सहमती नहुँदा नेपालगन्ज मेडिकल कलेज शिक्षण अस्पताल कोहलपुरमा परिवारले सोमबार शव उठाएका छैनन् । उक्त अस्पतालमा कैलाली, गौरीगंगा-९ मसुरिया निवासी २३ वर्षीया कमला धामीको शल्यक्रिया गरेर जुम्ल्याहा बच्चा (छोरा) निकालेपछि अचानक बेहोस् भएर मृत्यु भएको थियो ।
सामान्य अवस्थामा फर्केकी सुत्केरीको लापरबाहीकै कारण मृत्यु भएको परिवारले बताउँदै आएका छन् । अस्पताल प्रशासनसँग सोमबार दिउँसो भएको छलफलमा मृतकका परिवारले जुम्ल्याहा बच्चाको पालन पोषणका लागि राहत स्वरुप केही रकम दिनुपर्ने माग गरेका थिए । पीडित परिवारको मागलाई अस्पताल प्रशासनले ठाडै अस्वीकार गरिदिएपछि आइसियु कक्षमा रहेको सुत्केरीको शव नउठेको हो ।
मृतक कमला धामीको कोखबाट जन्मेका जुम्ल्याहा छोरा । तस्बिर : रमेश धामी
‘आमाको मृत्यु भइसकेपछि दुई बच्चाको लालन पालन गर्न सबैभन्दा ठुलो समस्या हुने भयो, त्यसकारण हामीले बच्चाको पालन पोषण गर्नका लागि केही राहत स्वरुप रकम दिनुपर्ने माग गर्यौं, तर अस्पताल प्रशासनले हाम्रो मागलाई ठाडै अस्वीकार गरिदिएपछि शव उठाएनौं,’ मृतकका जेठाजु रमेश धामीले भने ‘उल्टै हामीलाई हेपेर कुरा गर्नुभयो, यि टुहुर बच्चालाई लिएर हामी कहाँ जाउँ ? यि बच्चाको मानव अधिकार खै कहाँ छ ?’ धामीले अगाडी भने, ‘अस्पतालले अहिलेसम्म मृत्युको कारण बताउन सकिरहेको छैन, यिनीहरुको गल्तीले हाम्रो मान्छेको अकालमा ज्यान गयो, अस्पतालले जस्तो गल्ती गरेपनि छुट हुँदो रहेछ यो देशमा ।’
प्रशव बेथाले च्यापेपछि कमलाका श्रीमान र जेठाजुले असोज २७ गते कैलालीस्थित सेती अस्पतताल धनगढी पुर्याएका थिए । उक्त अस्पतालले शिक्षण अस्पताल कोहलपुरमा रेफर गरेपछि असोज २८ गते बिहान ३ बजेतिर ल्याएर भर्ना गरिएको थियो । डाक्टरसँगको सल्लाह, परामर्श अनुसार असोज २९ गते अपरान्ह ४ बजेतिर कमलालाई शल्यक्रिया कक्षमा लगिएको थियो ।
‘शल्यक्रिया गरेर जुम्ल्याहा छोरा जन्मियो, बेलुका ६ बजेतिर बुहारीलाई नर्मल वार्डमा ल्याएर सारियो,’ रमेशले स्मरण गर्दै भने ‘त्यसपछि बेलुका ७ बजेतिर बुहारी एक्कासी बेहोस् भइन्, हामी अत्तालियौं, डाक्टरलाई खोज्यौं, बल्लतल्ल राती १० बजे मात्र नर्सले आईसियुमा राखे ।’ सुत्केरीको अवस्था हेर्दा आइसियुमा राखेको भोलीपल्टै(३० गते) मृत्यु भइसकेको आशंका गरे ।
सुत्केरीको शरिर चल्न छाडेको दुई दिन भइसक्दा पनि डाक्टर र नर्सले आफुहरुलाई सोमबार बिहानसम्म औषधी किन्न लगाएको रमेशले सुनाए । उनका अनुसार शल्यक्रिया गर्नुअघिसम्म उनको सबै रिपोर्ट सामान्य थियो । अप्रेशन पश्चात कमलाले आफन्तसँग कुराकानी समेत गरेकी थिइन् ।
सुत्केरीको अवस्था जटिल बन्न थालेपछि आफुहरुले अस्पतालका डाक्टरलाई काठमाडौंको अस्पतालसँग कुरा गरिदिन र काठमाडौं लैजान तयार रहेको बताउँदा पनि बेवास्ता गरेको परिवारको गुनासो छ । आइसियुमा भर्ना भएकी बुहारीको होस् नखुलेरै मृत्यु भएको र कुन समयमा मृत्यु भयो भन्ने समेत आफुहरुलाई अस्पतालले जानकारी नदिएको रमेशले बताए ।
आइसियु कक्षमा लामो समयसम्म कृत्रिम श्वास दिएर राखिएकी कमलालाई सोमबार दिउँसो १ बजेमात्र डाक्टरले आधिकारिक रुपमा मृत्यु भएको बताएको परिवारले जनाएको छ । ‘बुहारीको मृत्यु त आइसियुमा राखेको भोलीपल्टै भइसकेको शंका लागेको छ, तर आज बिहानसम्म पनि औषधी किन्न लगाए, आइसियु कक्षमा लाश लडेको छ, बाहिर औषधी किन्न पठाए, यो अनुसन्धानको विषय छ,’ उनले भने ।
जुम्ल्याहा बच्चाको स्वास्थ्य अवस्था सामान्य छ । दुबै बच्चालाई परिवारले आफ्नो साथमा राखेका छन् । उनीहरुको हेरचाहमा अब समस्या आउने भन्दै उनीहरु चिन्तित छन् । शिक्षण अस्पताल कोहलपुरका प्रशासकीय अधिकृत सन्जु पन्तले सुत्केरीको ‘ब्रेन डेथ’ भयो भन्नेबारे आफुले सामान्य रुपमा जानकारी पाएको र पछि बुझेर बताउने यसअघि प्रतिक्रिया दिएका थिए । सोमबार बेलुका उनलाई पटक-पटक सम्पर्क गर्दा फोन उठाएनन् ।
यो पनि पढ्नुस् :
शिक्षण अस्पताल कोहलपुरमा सुत्केरीको मृत्यु, आफन्तले शव बुझ्न मानेनन्
